Abagore: U Rwanda rwasezereye Kenya

Ikipe y’igihugu y’u Rwanda y’abagore yasezereye ikipe y’igihugu ya Kenya nubwo ku mukino wabereye muri Kenya kuri iki cyumweru u Rwanda rwatsinzwe ibitego 2 kuri 1. Igitego Amavubi yatsindiye hanze cyatumye banganya 2 – 2 (mu mikino yombi) kuko Kenya ku mukino ubanza yatsinzwe igitego kimwe ku busa i Kigali.

Igitego kimwe cy’u Rwanda, ku mukino waberaga kuri stade yitwa Machakos Kenyatta kuri uyu wa 02 Werurwe cyatsinzwe na Uwamahirwe Shadia, w’imyaka 17 y’amavuko. Yakinjije mu gice cya mbere ku munota wa 30 yishyura icyo yari yatsinzwe mu ntangiriro z’umukino.

Mu gice cya kabiri ikipe ya Kenya yabashije gutsinda igitego cya kabiri, ndetse umukinnyi w’u Rwanda Uwamahoro Marie Claire ku munota wa 73 ahabwa ikarita itukura ariko aba bakobwa babasha kwihagararaho ntibatsindwa ikindi gitego.

Uyu ni umukino w’amajonjora yo guhatanira kujya mu gikombe cy’Isi cy’amakipe y’igihugu y’Abagore kizaba mu mwaka utaha muri Canada.

Algeria, Ghana,  Mali, Zambia, Tunisia, Zimbabwe n’u Rwanda ni amakipe yabonye itike yo gukomeza mu ijonjora rya nyuma.

Amakipe arindwi muri Africa azahurira ku mikino ya nyuma izabera muri Namibia mu kwezi kwa cumi uyu mwaka, bashaka amakipe azahagararira Africa.

Nyuma yo gusezerera Kenya, Amavubi azahura n’ikipe y’igihugu ya Nigeria ku matariki ya 22 na 25 Gicurasi uyu mwaka.

Nigeria izakina n’u Rwanda yagombaga gukina na Sierra Leone ariko iyi kipe yivana mu irushanwa. Nigeria yabaye iya kane mu gikombe cy’Afurika mu 2012 yari yatwaye mu 2010.

Imikino yabaye muri iyi week end :

28/2/2014 Tanzania 1-1 Zambia (1-2)
28/2/2014 Mali 0-1 Cote d’Ivoire (0-4)
01/3/2014 Zimbabwe 2-1 Botswana (1-0)
01/3/2014 Tunisia 2-2 Egypt (3-0)
01/3/2014 Morocco 0-0 Algeria (0-2)
01/3/2014 Ghana 3-0 Burkina Faso (3-0)

ububiko.umusekehost.com