Abagore bafunze bababajwe n’imiryango yabo itabasura

*Muri gereza ya Ngoma abasurwa ni 17% gusa
*Ngo nabo nubwo bafunze ni abantu bakeneye kwitabwaho

Abagore bafungiye muri Gereza ya Ngoma batangaje ko babajwe cyane no kuba imiryango yabo itajya ibasura kandi ngo nabo baba bakeneye kwitabwaho. Ibi umuryango mpuzamahanga urwanya ruswa n’akarengane Transparency International Rwanda wavuze ko ari ikibazo gikomeye ndetse unabonamo akarengane.

Kuri uyu wa gatatu hizihijwe umunsi mpuzamahanga w’abagore bari mu magereza ku rwego rw’igihugu uyu munsi wabereye muri gereza y’abagore ya Ngoma iherereye Iburasirazuba.

Kuri uyu munsi imfungwa n’abagororwa bishimiye ko leta y’u Rwanda ibitaho ntibafate nk’ibicibwa mu muryango nyarwanda nubwo baba barakoze ibyaha bitandukanye byatumye bafungwa.

Bamwe mu bafunze bagaragaje ko kimwe mu bibazo bafite ari ukudasurwa n’imiryango yabo ngo kuko iyo imiryango ibonye bafunze ibabigirwa ikabafata nk’abatakiriho nk’uko byavuzwe na Seraphine Nyirahabimana ufungiye muri gereza ya Ngoma.

Uyu mugororwa yagize ati “ Biratubabaza kandi turi benshi tutajya dusurwa, nkanjye maze imyaka icumu muri gereza ariko mu muryango mvukamo i Kayonza bansura rimwe mu myaka ibiri.”

Mme Marie Immaculee uhagarariye Transparency International ishami ryo mu Rwanda yamaganye iyi migirire y’imiryango y’abafunze avuga ko ibi ari ukutita ku babo ku buryo bukabije kandi bifatwa nk’akarengane.

Ingabire ati “Njyewe numvise binteye ubwoba, kubona hasurwa abantu batarenze 17% gusa, ibi birashimangira cya kibazo ubu turwana nacyo cy’uruhare rw’imiryango”.

Uretse iki kibazo cyagaragajwe n’abafunze muri rusange bagaragaje ko bishimiye ko bazirikanwe, ndetse Assistant Commissioner Bosco Kabanda ushinzwe uburenganzira bw’abagrorwa n’imibereho yabo muri RCS yavuze ko n’iyo umuntu yaba afungiye ibyaha runaka bitamukuraho kuba ari umuntu ukeneye kwitabwaho kimwe n’abandi.

Iyi gereza y’abagore ya Ngoma igizwe n’imfungwa n’abagororwa b’abagore 699 abasurwa ngo ntibarenga 17% by’aba bose.

Elia BYUK– USENGE
UM– USEKE.RW