Ababyeyi bakorewe iyica rubozo bibutswe

Mu gikorwa cyateguwe na Hope Foundation, umuryango AVEGA Agahozo bafatanyije kandi n’abanyeshuri bo muri APE Rugunga muri week end ishize hibutswe ababyeyi n’abakobwa bicwe muri Jenoside yakorewe Abatutsi ariko bakicwa mu buryo buteye ubwoba cyane.

Nyuma y’urugendo rwo kubibuka, hafashwe amagambo atandukanye yiganjemo ayo kwibaza aho abantu bari bavanye ubunyaswa bwo kwica abandi bantu babakoreye iyica rubozo ritigeze ribaho mbere mu Rwanda rwa Gasabo.

Uwari ahagarariye CNLG Mukagasana Yolande  yavuze ko nubwo ibyo bibuka biteye agahinda cyane, ariko  ikimushimishije ari ukuba abana bitabiriye cyane gahunda yo kwibuka abategarugori bakorewe iyicwa rubozo muri Jenoside.

Ati “ Aba bana benshi bari aha bavutse nyuma ya Jenoside cyangwa bari bato cyane, ariko kuza kwibuka amahano yakorewe abategarugori ni ikimenyetso ko aya mateka mabi atazibagirana.”

Umuyobozi wa transparency Rwanda Ingabire Marie Immacule  yavuze ko  nta kintu kibabaje kurenza guhohoterwa ku myanya ndangagitsina, gufatwa ku ngufu, guterwa ibisongo n’ibindi bibi byakorewe abatutsikazi benshi bibukaga none.

Murumunawabo Cecile wari umushyitsi mukuru waje ahagarariye Imbuto Foundation, mu ijambo rye yabwiye urubyiruko rwari aho ko rukwiye gufata ubuzima bwabo nk’ikintu cy’agaciro kurusha ibindi byose bibaho.

Yabasabye kwirinda kwishora mu busambanyi n’ibiyobyabwenge kugirango bagire icyo bazimarira banakimarire igihugu.

Remera Nathalie ni umwe mu rubyiruko witabiriye uyu muhango, ntabwo azi Jenoside kuko yavutse imyaka ibiri nyuma yayo.

Yabwiye Umuseke.rw ko iyo atekereje uko ababyeyi bicwaga yumva agize agahinda kenshi cyane akaba ngo ariyo mpamvu yumva akwiye guha agaciro gakomeye umubyeyi, ndetse nawe akifuza kuzaba umubyeyi mwiza.

Daddy SADIKI RUBANGURA
UM– USEKE.RW