Haruna yasinye imyaka 2 muri Yanga Africans

Amakuru dukesha ikinyamakuru mwanaspoti cyandikirwa muri Tanzania nuko Haruna Niyonzima yasinye amasezerano y’imyaka 2 mw’ikipe ya Yanga Africans yo muri Tanzania, amafaranga yasinyiye akaba atashyizwe ahagaragara.

Haruna akaba kuri uyu wa mbere ngo yaba yari yerekeje muri Tanzania nyuma y’uko ikipe ye ya APR imuhaye akaruhuko ngo ntakore imyitozo yo kuri uyu wa mbere aho bari kwitegura imikino ya CECAFA Kagame cup.

Ushinzwe ibya contaro (Registration officer) mw’ikipe ya Yanga Africans Salum Rupia niwe wemeje ko Haruna yasinye amasezerano y’imyaka 2 na Yanga Africans kuri uyu wa mbere.

Haruna ku cyumweru amaze guha ikipe ya APR igikombe cy’amahoro, umunyamakuru w’umuseke.com Fabrice Tuyishime yamubajije niba atazajya muri Yanga, Haruna ati:”kuri ibyo ntacyo natangaza”

Ubuyobozi bwa APR bwo bwemeza ko Haruna ari umukinnyi wa APR, ko agifite amasezerano azarangira tariki 28/09/2011, naho mwanaspoti ikavuga ko Haruna yemeza ko amasezerano ye azarangira tariki 28/06 uyu mwaka.

Mwanaspoti ivuga ko umwe mu bayobozi bwa APR yayitangarije ko Yanga igomba kwibagirwa ibyo kugura Haruna, ko APR itagurisha captain wayo ndetse akaba na Captain w’ikipe y’igihugu.

umuseke.com