Bugesera-Umwanda w’umuntu bawufumbiza imyaka

Muri uku kwezi kwahariwe kubungabunga ibidukikije, kuri uyu wa kabiri mu karere ka Bugesera hatashywe uburyo bushya bwo bwo kubona ifumbire hakoresheje imyanda y’abantu.

Nkuko umuseke.com wabitangarijwe n’abakoze ubu buryo bwo gufata imyanda y’abantu (Inkari n’amazirantoki) bavuga ko iyi myanda ari ifumbire ikomeye ku bihingwa bitandukanye, ikindi kandi bakishimira ko iyi fumbire nshya iboneka buri munsi.

Ingenieur Coletta Ruhamya, Umunyamabanga wa Leta ushinzwe ingufu n’amazi mu gutangiza iki gikorwa yagize ati : « tugomba gukoresha uburyo bwose bwadufasha kuzamura ubukungu no kongera umusaruro ntacyo tujugunye ngo cyangize ibidukikije »

Ku bigo bitatu mu Bugesera aribyo Nyamata High School, ishuri ribanza rya Juru n’ishuri rikuru rya Ecole Secondaire Rilima APEBU, hatashywe ndetse uburyo bwo gufata, kuyungurura (hifashishijwe ibumba) no gukoresha amazi y’imvura yashyizwe mu bigega. Aya mazi ngo azajya abikwa anifashishwe mu gihe cy’impeshyi.

Hatashwe kandi Biogas, nayo ituruka ku mwanda uba watawe n’abanyeshuri, iyo Biogas ikafasha mu kubatekera, kubacanira umuriro w’amashanyarazi n’ibindi.

Ibyo bikorwa byatwaye amafaranga agera kuri miliyoni 98, yatanzwe na Mininfra, World Vision ibikoresho byibanze bitangwa n’ibigo by’amashuri.

Daddy Sadiki RUBANGURA

umuseke.com