Mani agarutse mu gitaramo kidasanzwe yise “Mani Martin Live Concert’’

“Mani Martin Live Concert’’ ni igitaramo umuhanzi Mani Martin ateganya gukorera muri Serena Hotel ku itariki ya 1 Nzeli 2013 guhera saa 18h30 aho azaba ataramira abakunzi b’umuziki nyafurika ku buyo bwa Live nanone.

Mu mpera z’umwaka ushize, benshi bemeza ko uyu musore yanditse amateka muri Serena Hotel mu gususurutsa abakunzi ba muzika gakondo kandi ya Live.

Ubu nanone Martin azacurangirwa na Band ye yitwa “Kesho Band”, bamaze igihe bazengurukana mu maserukiramuco hirya no hino muri Afurika.

Kuri uyu wa 15 Kanama 2013  Mani Martin yabwiye abanyamakuru bimwe mu bizaranga igitaramo cye.

Yagize ati:’’ Muri iki gitaramo nzaririmba indirimbo natangiriyeho mu buhanzi, izo namenyekaniyeho zose, ndetse n’izo mperuka gusohora. Muri make nzerekana urugendo rwanjye muri muzika’’

Mani Martin yavuze kandi ko atazakerererwa nk’uko bikunze kugaragara kuri  bamwe mu bahanzi, ahubwo ko muri icyo gitaramo ndetse no mu bindi azategura isaha izahora ari isaha.

Muri iki gitaramo azafashwa kandi n’umwana w’umuraperi witwa Babou uzaririmbana n’abandi bana bato ku buryo bwa Live.

Azafatanya kandi na Nirere Shanel uvuye muri France, Ras Kayaga n’abandi. Kwinjira muri iki gitaramo kizabera muri Serena Hotel bikazaba ari 10 000Frw ku muntu.

Plaisir MUZOGEYE
UM– USEKE.RW