Amagambo na Raporo kuri Congo birahagije ni umwanya w’amahoro – Mushikiwabo

25/07/2013 – Mu gitondo cy’i New York ku kicaro cy’Umuryango w’abibumbye (hari ahagana saa kumi n’imwe mu Rwanda) inama y’uyu muryango yateranye ngo yige ku kibazo cy’umutekano mu karere. DRCongo niyo yari izingiro ry’iyi nama ya none. Hon Mushikiwabo wari uahgarariye u Rwanda ahawe ijambo yashimangiye ubushake bw’u Rwanda mu gushakira amahoro igihugu gituranyi, yavuze ko amagambo (speeches) n’amaraporo byinshi byavuzwe kuri iki kibazo, ubu ari umwanya wo kugera ku mahoro arambye.

Umunyamabanga wa Leta z’Unze ubumwe za Amerika John Kelly niwe wari uyoboye iyi nama yihariye ku karere k’ibiyaga bigari.

Yavuze ko ibizo biri muri Congo bishingiye cyane cyane ku miyoborere mibi, avuga ko nk’umuryango w’abibumbye bose hamwe bakeneye kugira icyo bakora kugirango Congo iramutswe amahoro.

Mu ijambo rye yashimiye abagira uruhare mu kugerageza kugarura amahoro muri Congo, yavuzemo Ban Ki-moon , Dr Jim Yong Kim Perezida wa banki y’Isi ndetse na Marry Robnson intumwa ya UN mu karere k’ibiyaga bigari.

Yavuze ko USA ishyigikiye umutwe woherejwe guhashya imitwe yitwaje intwaro (Force Intervention Brigade, FIB) mu butumwa bwayo bwo kwambura intwaro imitwe iri mu burasirazuba bwa Congo.

Ban Ki-moon we yagize ati “ Ndasaba ko bidatinze impanze zombi, Leta ya Congo ndetse n’abarwanyi ba M23 gusubira mu biganiro i Kampala bagashakira igisisubizo cy’intambara mu nzira za Politiki.”

Yibukije ko Banki y’Isi yatanze miliyari y’amadorali ku bihugu byo mu karere ngo iyo nkunga igende ihindure imibereho y’abatuye akarere k’ibiyaga bigali, ariko ngo iyo nkunga ikwiye gukoreshwa mu gihe cy’amahoro.

Mu ijambo ry’intumwa yihariye ya Ban Ki-moon mu karere, Mary Robinson yavuze ko niba havugwa ko hari ibihugu bifasha imitwe yitwaje intwaro muri Congo, umutwe ushinzwe kwambura intwaro iyo mitwe (FIB) ari uburyo bwa nyabwo bwo kuvanaho iyo mitwe no kuvanaho urwo rwikekwe.

Ministre w’ububanyi n’amahanga wa Uganda Sam Kutesa we yatangaje ko ibiganiro by’i Kampala hagati ya M23 na Kinshasa aribyo byatanga umusaruro mu gukemura amahoro, we avuga ko kuva mu Ukuboza umwaka ushize hari icyo byagezeho nubwo bitakomeje kubera impamvu ngo Guverinoma ye itagizemo uruhare.

Ministre Kutesa avuga ko Umuryango w’Abibumbye niba ushakira amahoro akarere ukwiye gufasha ibikorwa bya ICGL (The International Conference on the Great Lakes Region) nk’ingabo zihuriwe zashyizweho mu kugenzura  imipaka (Joint Verification Mechanism) ndetse no gutanga ibikenerwa ngo imishyikirano ya Kampala ikomeze.

Raymond Tchibanda Ministre w’Ububanyi n’amahanga wa Congo we mu ijambo rye akaba yareze M23 kugaba ibitero ku ngabo za FADRC no kubeshyera izo ngabo zo zarashe ku baturage.

Tchibanda yahakanye cyane ko hari ubufatanye n’abarwanyi ba FDLR n’ingabo za Leta ye, yemeza ko kimwe mu bitera abaturage ba Congo amage barimo harimo n’aba barwanyi ba FDLR. Bityo ko badashobora gukorana na rimwe.

Ministre Louise Mushikiwabo wavuze, nyuma ya Tchibanda, mu izina ry’u Rwanda, yavuze ko u Rwanda rushyigikiye inzira z’amahoro mu gukemura ikibazo cya Congo harimo n’ibiganiro bya Kampala.

Hon Mushikiwabo avuga ku bushake bw’u Rwanda mu gushakira amahoro Congo, yasabye ko Umuryango w’abibumbye ugena iby’ingabo za M23 zigera ku magana zahungiye imirwano mu Rwanda, avuga ko u Rwanda rucumbikiye impunzi z’abanyecongo zigera ku 7 000 zahunze intambara muri Congo mu myaka 13 ishize, avuga ko u Rwanda rwafashije umuryango mpuzamahanga mu gushyikiriza Gen Bosco Ntaganda ubutabera bwamushakaga ubwo yahungiraga mu Rwanda.

Avuga kandi ko u Rwanda rwashyigikiye ubushake bwose bwo kugarura amahoro muri Congo biciye mu biganiro n’ubwumvikane.

Aha Mushikiwabo akaba yashimangiye ko u Rwanda rugifite ubushake bwo kugarura amahoro arambye ku muturanyi wabo.

Ubufatanye bwa FARDC na FDLR

Min Mushikiwabo wahawe ijambo nyuma y’abandi barebwa ku buryo butaziguye n’inama y’uyu munsi, aha yavuze ko ubu bufatanye  u Rwanda rubifata nk’ikintu gikomeye, ntiyashatse gusubira mu ibaruwa ndende yandikiwe Ban Ki-moon.

Hon Mushikiwabo yagaye imyitwarire (ikubiye mu ibaruwa yandikiwe Umunyamabanga wa UN n’akanama k’Umutekano ka UN) y’ingabo zatumwe n’Umuryango w’Abibumbye muri Congo.

Avuga ko amagambo ku kibazo cya Congo yavuzwe na za raporo zanditswe bihagije, ko abantu bamwe babonye ikibazo cya Congo nk’ikintu cyo kwamamaza, ko igihe kigeze ngo ingabo zatumwe na UN zikore akazi kazijyanye kandi inzira z’amahoro zubahirizwe.

Nyuma ya Louise Mushikiwabo, abandi bavuze barimo uhagarariye Guatemala, France, Togo, Azerbaijan, Ubushinwa, Pakistan, UK, Russia, Maroc n’abandi bose bagiye bavuga ko bikwiye ko ibihugu byo mu karere, na cyane cyane Congo ubwayo aribyo bikwiye gutera intambwe nini mu kwishakira amahoro. Aba bose bakaba bavugaga ingingo zabo John Kelly wari uyoboye iyi nama yagiye, agasiga umuhagararira.

JP GASHUMBA
UM– USEKE.RW