Ubuhinzi mu Rwanda bugiye kugira umusaruro uhagije ku buso buto bushoboka

Mu Rwanda, kuri uyu wa kane tariki ya 25 Nyakanga hafunguwe gahunda y’ubushakashatsi (Humidtropics) buzatuma ubuhinzi   bubona umusaruro ku buso buto bushoboka ndetse n’inyungu ziva kuri uwo musaruro zirusheho kugira uruhare rukomeye mumibereho myiza y’abaturage.

Umuyobozi mukuru w’ ikigo kigihugu cy’ubunzi(RAB) Prof.Jean Jacques Mbonigaba Muhinda  niwe wafunguye bwambere mu Rwanda iyo gahunda  y’ubushakashatsi( Humidtropics) ihuriweho n’ibihugu bitandukanye biri muri Afrika y’uburasirazuba niyohagati, Asiya yo hagati n’ibihugu by’amerika yo mumajyepfo.

Iyi  gahunda ngo  yashyizweho kubufatanye bw’ibigo by’ubushakashatsi bitandukanye muri ibyo bihugu birimo nka CGIAR.

Prof.Jean Jacques Mbonigaba Muhinda afungura iyi gahunda ndetse n’inama y’iminsi ibiri ihuje bamwe mubashakashatsi bo mu Rwanda ndetse n’abo hanze ariko bakabukora bishingiye ku buhinzi n’ubworozi yavuze ko  izafasha ibikorwa by’ubushakashatsi bigamije  ibintu bibiri.

Ibyo ni ukongera umusaruro kubuso buto bushoboka no  kongera inyungu ziva kumusaruro w’ubuhinzi n’ubworozi  bityo ngo bikazongera imibereho myiza bigabanya ubukene cyane cyane kubahinzi n’aborozi  bo mu cyaro.

Iyi gahunda y’ubu bushakashatsi (Humidtropics )ikaba aho igomba  gukorera  hose ku isi hari ubuso bungana na hegitari zigera kuri miliyari eshatu  zituyeho abagera kuri miliyari 2.9 bose bakora umwuga w’ubuhinzi , umwuga usanga  ukorwa n’abanyarwanda benshi.

Ubu hamwe na hamwe iyo gahunda ikaba yaratangiye nkuko no mu Rwanda yatangiye bikaba biteganyijwe ko nibura mu myaka 15 irimbere umusaruro uva kubuhinzi n’ubworozi waba wiyongereye kukigero cya 60% aho gahunda igomba gukorera.

Iyi gahunda izafasha mukuzamura umusaruro  aho ibyo bihugu bigomba gusangira ibyo gukoresha ikoranabuhanga  rihanahanwe muri byo  kubyerekeranye n’ ifumbire y’imborera n’imvaruganda ,  gukoresha imbuto nziza, gufata neza umutungo kamere urimo ubutaka , amazi, kurwanya isuri no gutera ibiti  bivangwa n’imyaka  kuko ngo ibyo byose hari aho byagiye bigira umusaruro kandi ibyo bizahanwahanwa hagati y’ibihugu ubwo bushakashatsi bugomba gukorerwamo kugirango umusaruro ube wazamuka  bityo ngo abaturage bave mubukene.

Iyi gahunda ngo izanafasha kwigisha abaturage kugirango birinde imirire mibi dore ko hari nabo usanga barya nabi ndetse kandi bakagerwaho n’ingaruka zimirire mibi kandi  barejeje byinshi, ibyo byose ngo biterwa n’imyumvire mike ikwiye guhinduka maze buri wese akumva ko ari inshingano ye yo kurya indyo yuzuye.

Iyi gahunda ngo izafasha  guhangana nibibazo byiburumbuke bw’ubutaka aho ubu hari henshi hagaragara ubusharire bw’ubutaka bityo bigatera umusaruro muke kuri hegitari imwe(ha).

Iiyi gahunda izafasha  gukomeza gukora ubushakashatsi  ndetse no gukomeza kwigisha abaturage gukoresha inyongera musaruro zifasha kubona umusaruro mwiza kuri ubwo butaka bushaririye, iyi gahunda ntizareba ubuhinzi gusa ahubwo izanafasha no kungera umusaruro w’ubworozi hakorwa ubushakashatsi kumirire y’amatungo nibindi.

Emmanuel TUYISENGE
UM– USEKE.RW