APR Handball Club izaserukira u Rwanda mu mikino ya gisirikare i Nairobi

APR Handball  Club ikipe y’ingabo z’Igihugu zikina umukino  wa Handball yashinzwe mu mpera z’umwaka wa 2007,  itangira kwitabira amarushanwa ategurwa n’ishyirahamwe  ry’umukino w’amaboko wa Handball ku rwego rw’Igihugu mu mwaka wa 2008.

Uko yagiye itera imbere ni nako yagiye itwara ibikombe bitandukanye harimo igikombe kiruta ibindi mu gihugu kizwi ku izina rya super coupe, ibikombe bya Championat y’igihugu, ibikombe by’irushanwa ry’intwari z’Izigihugu,  iby’irushanwa ryo kwibohora,ndetse n’ iby’irushanwa rihuza amakipe 4 ya mbere muri Championat National  rizwi ku izina rya carree d’as.

APR Handball kandi  yitabira imikino ihuza ingabo z’ibihugu bigize Africa y’iburasirazuba, kuri ubu ikaba imaze kuyitabira inshuro ebyiri mu bimaze yegukana umwanya wa Kane.

APR Handball yakuriyemo abakinnyi benshi bakomeye ku rwego rw’Igihugu kandi bose b’Abanyarwanda, ikiba inakomeje kugaragaramo abana bakiri bato bafite impano n’ubuhanga muri uyu mukino nkuko byagaragaye mu irushanwa ryo kwibuka abari abakinnyi, abakunzi n’abayobozi b’amakipe atandukanye bakinaga umukino  Handball bazize Genocide yakorewe abatutsi mu mwaka wa 1994, ryabaye ku wa 09/06/2013 ubwo APR Handball yegukanaga icyo gikombe itsinze ikipe ya Police National ku mukino wanyuma.

Uyu mwaka APR Handball ikaba iri mu myitegure yo kwitabira ku nshuro ya Gatatu imikino ya Gisirikare izabera mu gihugu cya Kenya, amakuru dukesha Captain w’iyo kipe Hakizimana Celestin akaba avuga ko iyi kipe ihagaze neza mu myitozo, nta mukinnyi wayo ufite ikibazo yemera akanizera ko bazitwara neza bakanegukana igikombe muri iyi mikino izatangira ku itariki ya 5 Kanama igasozwa kuya 17 Kanama  2013.

Roger Marc rutindukanamurego
UM– USEKE.RW