Minisitiri Mitali yashimiye cyane Miss Rwanda

Nyuma yo gutorerwa umwanya wa Miss FESPAM 2013, Miss Rwanda Aurore Mutesi na Gakondo Group bakiriwe na Minisitiri wa Siporo n’umuco, Mitali Protais kuri Sports View Hotel i Remera kuri uyu wa 22 Nyakanga aho yabashimiye uburyo bahagarariye igihugu cyabo neza.

Muri uyu muhango benshi mu bafashe ijambo bagarutse ku gutaka imico n’imyifatire ya Aurore wabaye ntamakemwa ikanamugeza ku ntsinzi i Brazzaville.

Masamba Intore  na Patrick Muhire, bari kumwe na Aurore bavuze ko yari atandukanye n’abandi bakobwa mu bijyanye n’imyifatire.

Mu ijambo rye Minisitiri Mitali yashimiye cyane Aurore Mutesi na Gakondo avuga ko baserukiye u Rwanda uko bikwiye.

Yavuze kandi ko u Rwanda ruri kurushaho kwesa imihigo, aho yatanze ingero za bamwe mu bakinnyi bari kwegukana imidari hirya no hino ku isi.

Minisitiri Mitari yagize ati “Kubona tubonye igikombe cy’umuco no muri siporo turi hafi kubizana. Buriya Abanyarwanda dushobora kuzana ibikombe byinshi bishoboka kuko ubushake turabufite”.

Nyampinga Aurore yabaye Miss FESPAM muri Congo Brazzaville ku itariki ya 17 Nyakanga 2013, aho yari yaserukiye u Rwanda muri iri serukiramuvco rya muzika. Azambara iri kamba imyaka ibiri.

Photos/PMuzogeye

Plaisir MUZOGEYE
UM– USEKE.RW