The Blessing Family yateguye igitaramo cyo kubyina kirimo udushya

Umuryango The blessing family ugizwe n’abahungu n’abakobwa b’abakirisitu babyina indirimbo zitandukanye zo guhimbaza Imana, wateguye igitaramo ngarukamwaka ku nshuro ya kabiri, kizabera ku gicumbi cy’Umuco kuri stade i Remera, bavuga ko kizaba kirimo udushya twinshi bafatanyije n’abahanzi batandukanye.

Umuyobozi wa The Blessing Family, Semunyana Octave mu kiganiro n’abanyamakuru, yatangaje ko iki gitaramo bateguye kigamije guhimbaza Imana mu ndirimbo no mu mbyino zitandukanye.

Semunyana yagize ati : ”Iki gitaramo kizaba kirimo agashya kuko icyo twakoze umwaka ushize twabyinaga indirimbo z’abandi ariko ubu tuzabyina n’indirimbo zacu twihimbiye.”

Muri iki gitaramo bakazafatanya n’abahanzi batandukanye baririmba indirimbo zo guhimbaza Imana barimo Aime Uwimana, Patient Bizimana, Patrick Nyamitari, itsinda Beauty for Asher hamwe n’umuhanzi wo mu Burundi witwa Dudu.

Kizabera ku Gicumbi cy’Umuco i Remera, iruhande rwa sitade nini tariki ya 4 Kanama 2013. Kwinjira muri icyo gitaramo babigabanyijemo ibice 2 : Amafaranga y’u Rwanda 2000 na 5000.

Umuryango The Blessing Family wavutse tariki ya 16 werurwe 2010, ugizwe n’abahungu 16 n’abakobwa 14 baturuka mu madini atandukanye ya gikiristo.

Uretse kuririmba bakora n’ibindi bikorwa by’urukundo birimo kurihirira amashuri abana batishoboye.

Intego y’aba basore n’inkumi ni ukwamamaza ubutumwa bwiza mu ndirimbo zo guhimbaza Imana binyuze mu byino zitandukanye, zaba izo mu njyana ya Kinyarwanda, inyafurika ndetse n’iya kizungu.

Patrick KANYAMIBWA

UM– USEKE.RW