Muzika ya none n’abayikora ntabwo mbyishisha – Makanyaga

Mu bahanzi bo hambere aha, Makanyaga Abdul ni umwe mu bakigaragara cyane muri muzika kugeza n’ubu, byumwihariko ariko niwe uri mu bagaragara bakorana cyane n’abasore n’inkumi bakora muzika igezweho, impamvu ngo ni uko yumva atabishisha kandi muzika yabo ikaba ariyo nyine igezweho.

Makanyaga, yakunzwe hambere muri Orchestre Impala n’ahandi yagiye aririmba ubu ari gutunganya indirimbo afatanyijemo n’abahanzi bakorera muri Kina Music.

Uzasanga abahanzi bamwe bo hambere bavuga ngo muzika ya cyera niyo yari nziza cyane, Makanyaga nawe ntabihakana ariko yemeza ko na muzika y’ubu atari mbi na gato kandi we nk’umunyamuzika w’umwuga azakomezanya n’aho umuziki ugana.

Muri Kina Music afatanyije n’abahanzi nka Tom Close, Dream Boys, Knowless na Christopher bari gutunganya indirimbo izasohoka vuba bise “Rubanda”

Makanyaga ati “ Nashimishijwe n’uko aba bahanzi bansabye ko dukorana mu njyana z’ubu, nshimishwa kandi n’uburyo nabo baririmba kuko ni abahanga cyane. Muzika y’ubu rero n’abayikora ntabwo mbyishisha nshingiye kuri muzika ya kera nayo nakoze cyane.”

Ishimwe Clement uyobora Kina Music avuga ko nawe yanejejwe no kuba Makanyaga atarabagoye mu kwemera ko bakorana.

Ati “yakiriye ikifuzo cyacu neza, ubu turi gukorana indirimbo yo izasohoka mu mpera z’iki cyumweru.”

Aya ni amwe mu mafoto yo kizaba kiranga iyi ndirimbo ndetse iyi myambarire isa n’iya cyera niyo izagaragara mu mashusho yayo nubwo ngo ataratangira gutunganywa.

Photos/PMuzogeye

Plaisir MUZOGEYE
UM– USEKE.RW