Bugesera: Abamotari barasabwa kugira imihigo no gukumira magendu

Ubuyobozi bw’Akarere ka Bugesera n’inzego z’umutekano zihakorera, barakangurira abamotari kugira imihigo no guharanira kuva ku rwego rumwe bajya ku rundi, by’umwihariko kandi ngo bakanafasha inzego z’umutekano mu kurwanya magendu.

Ibi byagarutsweho mu nama yahuje ubuyobozi bw’Akarere ka Bugesera, inzego za Polisi n’iza gisirikare n’amashyirahamwe y’abamotari agakoreramo.

Rwagaju Louis, umuyobozi w’Akarere ka Bugesera yasabye abamotari gukora cyane bakiteza imbere, ariko kandi ngo byaba byiza nabo bagiye bakorera ku mihigo.

Ngo byaba byiza buri mukotari ku giti cye agiye yiha imihigo hanyuma umwaka washira akareba akikorera isuzuma bigatuma agira icyerekezo cy’umwaka ukurikiyeho.

Rwagaju kandi yasabye abamotari gutekereza no ku yindi mirimo yatuma barushaho gutera imbere bitari, ugutwara moto gusa.

Yagize ati “Mukwiye kutagira imyumvire yo gutunga moto gusa ahubwo mwabifatanya no guhinga urutoki, korora amatungo n’ibindi bibunganira kugera kuri byinshi kandi vuba.”

Umuyobozi wa Polisi mu Karere ka Bugesera Spt Donat Kinani, yabasabye kurushaho kubahiriza amategeko agenga gutwara abagenzi ndetse no gufatanya n’inzego z’umutekano mu gukumira ibyaha bitaraba, kuko ngo Polisi itagera ku nshingano zayo neza hatabayeho ubufatnye bw’inzengo zose.

Kinani kandi yihanangirije abamotari bakoreshwa mugutwara magendu n’ibiyobyabwenge kuko ngo nibatabireka Polisi izakomeza kubahiga kandi byanze bikunze izajya ibafata, bityo ngo ibyiza n’uko bajya baha amakuru Polisi bakiri kare.

Ku kibazo cy’uko ngo batagira aho bahagarika (parking) moto zabo hahagije, umuyobozi w’Akarere yabasabye ko batanga urutonde rw’aho basha gukorera hatabangamiye umutekano muri rusange bakahabaha.

NGIRUWONSANGA J.Damascene
UM– USEKE.RW/ Bugesera