Jeannette Kagame i New York kurwanya SIDA

NEW YORK –  Madamu Jeannette Kagame yitabiriye inama y’abafasha b’abakuru b’ibihugu  yaberaga ku cyicaro cy’ umuryango w’abibumbye, iyo nama ikaba yarigaga ku birebana n’ agakoko gatera SIDA, ahari gushakishwa inkunga mu rwego rwo gufasha abahuye n’ ubwo bwandu, no kureba uko gahunda ya EMCT yaba yashyizwe mu bikorwa muri 2015.

Jeanette Kagame i New York

Iyi nama y’ iminsi itatu, ni imwe mu ma nama akomeye y’ inteko rusange y’ umuryango w’abibumbye, ikaba ihuza abakuru b’ ibihugu n’abakuru ba za gouvernement, abahagarariye imiryango mpuzamahanga, sosiyete sivile, ndetse n’abahagarariye ababana n’agakoko gatera SIDA, aho baganira kuri ejo hazaza mu rwego rwo gushakira umuti w’ingaruka ziterwa n’ubwandu bwa SIDA ku isi.

UNAIDS itangaza ko abana 1000 banduzwa agakoko gatera SIDA buri munsi, 90% muri abo bakaba babarizwa munsi y’ ubutayu bwa SAHARA. Icyorezo cya SIDA kandi ni kimwe mu bitera imfu nyinshi z’ababyeyi mu bihugu  bikennye.

Iyi nama y’abakuru b’ibihugu, ikaba yaritabiriwe n’abayobozi batandukanye, harimo Bwana Ban-Ki Moon, Mr. Michel Sidibe, umunyamabanga nshingwabikorwa wa UNAIDS , na  Azeb Mesfin, umufasha wa Ministre w’ intebe wa Ethiopia  na perezida w’ihuriro ry’abafasha b’abakuru b’ibihugu bya Africa.

Madamu Jeannette Kagame akaba yaratangije ubukangurambaga rugamije kurandura ubwandu bwa SIDA buturuka ku mubyeyi yanduza umwana, haba mu gihe cyo kubyara, cyangwa mu gihe cyo konsa, buzwi ku izina rya EMTCT(Elimination of Mother to Child Transmission).

Umuseke.com