Kenya: Obama ntazasura iki gihugu, ariko Abanyakenya ntacyo bibabwiye

Ubuyobozi bw’igihugu cya Kenya bwatangarije ibinyamakuru mpuzamahanga bitandukanye ko nta kibazo bigeze bagira ku rugendo Perezida Barack Obama azagirira ku mugabane wa Afurika yarangiza agasubira muri Amerika  atageze ku butaka bwa se muri Kenya.

Umuvugizi wa guverinoma muri Kenya Muthui Kariuki yatangarije ibiro Ntaramakuru by’Abafaransa AFP ko Kenya nta kibazo yigeze igira ku ruzinduko rwa Obama. Avuga ko nka Perezida wa Leta Zunze Ubumwe z’Amerika afite uburenganzira bwo guhitamo ibihugu azasura.

Gusa uru ruzinduko rubaye mu gihe iki gihugu gifite ibibazo by’uko urukiko mpuzamahanga mpanabyaba ICC rukurikiranye bamwe mu bayobozi bakauru b’iki gihugu barimo Uhuru Kenyatta umukuru w’igihugu n’umwungirije William Ruto kugira uruhare mu bikorwa  bihungabanya  uburenganzira bw’ikiremwa muntu muri iki gihugu.

Kariuki agira ati:”Kenya irimo gutera imbere kubera umurongo yishyiriyeho kandi tuzakomeza kuba igihugu gifatanyirije hamwe, ni kubw’izo mpamvu rero nta mpungege dufite ngo Obama ntazadusura muri Kenya. Twe tumeze neza”.

Uyu mugabo avuga ko abavuga ko Obama yanze kuza muri Kenya kubera ibibazo ifitanye na ICC ari ibihuha.Ati:”ibyo ni ibirego bidafite aho bishingiye”.

Ikinyamakuru Capitalism dukesha iyi nkuru kivuga ko mu minsi ishize umwe mu bayobozi mu biro bya Obama muri White House yavuze ko Obama atazasura Kenya mu rwego rwo kutijandika mu bibazo ifitanye na ICC.

Gusa Abanyakenya benshi babajijwe kuri iki cyemezo cyo kudasura  iki gihugu kwa Perezida wa Amerika kandi yaje muri Afurika bavuze ko abashaka  kuvuga na bi igihugu cyabo bitwaje ikibazo cya ICC nta shingiro bafite ngo kuko Uhuru na Ruto batorewe kuba abanyobozi b’iki gihugu ikibazo cya ICC gisanzwe gihari.

Bakomeza bavuga ko ibihugu by’Uburayi na Amerika bikenera Kenya nk’uko Kenya na yo ibikenera ngo nibarekereho rero  abashaka kuvuga na bi Kenya bitwaje ICC.

Bati:”Igihe kizagera Obama ashake kuza muri Kenya. Tumeranye neza na perezida wacu, kuba  Obama yaza cyangwa ataza nta cyo bitubwiye”.

Bitenganyijwe ko hagati ya tariki 26 Kamena na tariki eshatu Nyakanga uyu mwaka wa 2013  Perezida wa Leta zunze ubumwe za Amerika azagirira uruzinduko ku mugabane wa Afurika.

Muri uru ruzinduka akaba azasura ibihugu bya Senegal, Afurika y’Epfo, Tanzaniya.

Muri uru ruzinduko kandi Obama azaherekezwa n’abandi bayobozi bakomeye muri iki gihugu ndetse n’umugore we Michele Obama. Bakaba  bazagenda baganira n’abayobozi bi bihugu bazanyuramo  ku buryo bwo kwimakaza demokarasi kurushaho no guhamya iterambere.

Perezida Barack Obama asuye umugabane wa Afurika ku nshuro ya mbere kuva yatorerwa kuyobora Amerika muri manda ya kabiri, muri manda ye ya mbere yasuye igihugu cya Ghana.

UM– USEKE.RW