Kagugu: Batangiye icyunamo bakusanya inkunga y’umukecuru w’imyaka 85 utishoboye

Ubwo hatangizwaga icyunamo kuri icyi cyumweru tariki ya 07/04/2013, abaturage mu kagari ka Kagugu umurenge wa Kinyinya akarere ka Gasabo bakusanyije amafaranga asaga ibihumbi bisaga 500 byo gufasha umukecuru utishoboye witwa Mukahigiro Verdiana w’imyaka 85.

Nyuma yo kumugarira muri Jenoside, ubumuga bwe bwariyongereye kugeza ubwo amaze imyaka itanu adahaguruka aho yicaye batamuteruye nkuko bitangazwa n’abaturanyi be.

Uyu mukecuru utari kubasha kugera aho iyo mihango yabereye, abaturanyi be bavuze ko bakoze igikorwa gishimishije kizatuma nawe yiyumvamo ikizere ko atekerezwaho.

Prof Kalisa Mbanda Umuyobozi wa komisiyo y’amatora wari muri uyu muhango yavuze ko inkunga nto yakusanyijwe kuri uriya mukecuru ivuze ikintu kinini, anasaba abaturage aho kuzakomeza kwita kuri uyu mukecuru Mukahigiro.

Kalisa Mbanda ati “ iki gikorwa cyiza mukoze kivuze byinshi, ni intambwe yo kwigira hadategerejwe ko inkunga ituruka ibunaka ngo ize kubakemurira ikibazo cyanyu, ni byiza ko mwagerageza kugikemura mu bushobozi bwanyu.”

Mukabaziga Patricia ni umwe mu bacitse ku icumu muri aka kagari Kagugu, we yasabye ko Leta ikwiye gufasha abana babo barangije amashuri yisumbuye batagize amahirwe yo gukomeza kwiga kugirango nabo bazashobora kurwana ku miryango yabo itishoboye ndetse inabana n’ubumuga bityo nayo irusheho kwigira nk’uko isanganya matsiko y’uyu mwaka ibivuga.

Gaspard Kajuga, ashinzwe guhuza ibikorwa byo kwibuka mu kagari ka Kagugu, yabwiye abitabiriye uyu muhango wo gutangiza icyunamo, gukomeza kuba hafi abacitse ku icumu muri ibi bihe, ndetse anabasaba kuzakomeza kwitabira ibiganiro bitegenyijwe mu midigudu.

Daddy SADIKI RUBANGURA
UM– USEKE.COM