Rayon Sport nyuma y’igihe kinini yabashije gutsinda Kiyovu

Mu mikino ibanza ya 1/4 cy’irangiza cy’igikombe cy’amahoro, MTN Peace cup, umukino wari utegerejwe cyane ni uwahuzaga Kiyovu Sport yari yakiriye Rayon kuri Stade Amahoro waje kurangira Rayon itsinze Kiyovu igitego 1 – 0.

Uyu mukino wagiye kuba nyuma y’igihe kinini Rayon Sport idakoraho ku bakuba bayo b’ibihe byose b’i Nyamirambo Kiyovu Sport. Mu mikino itanu yaherukaga kubahuza, Rayon yabashije kunganya rimwe gusa indi ine Kiyovu irayitsinda.

Igice cya mbere cy’uyu mukino cyarangiye ari ubusa ku busa, nyuma y’iki gice, umutoza Kayiranga Baptista yakoze ugusimbuza kw’abakinnyi babiri ubwo yinjizagamo Simon Okwi na Jean Pierre Maombi ariko batagize kinini baha iyi kipe ndetse na Ndayishimiye Yousouf bita Kabishi nawe yaje kujyamo ntiyagira byinshi akora kuko ab’inyuma bayobowe na Ndikumana Katauti bari bahagaze neza.

Ku munota wa 21 w’igice cya kabiri, Fouad Ndayisenga, umurundi ukinira Rayon Sport, yarekuye ishoti ry’imoso rikomeye muri metero nka 19 uvuye ku izamu umuzamu wa Kiyovu ntiyakurikira. Umukino ni uku waje kurangira.

Itsinzi ya Rayon kuri Kiyovu yishimiwe cyane n’umutoza Jean Marie Ntagwabira wari utaratsinda Kiyovu kuva yayivamo, ndetse n’abafana ba Rayon bari bataratsinda Kiyovu kuva mu 2010.

Dore imikino yaherukaga kubahuza uko yagenze:

21/04/12 Rayon 0 – 1 Kiyovu

28/12/11 Kiyovu 1 – 1 Kiyovu

04/05/11 Rayon 1 – 2 Kiyovu

19/12/10 Kiyovu 2 – 0 Rayon

27/03/10 Kiyovu 3 – 2 Rayon

 

Mu yindi mikino ya 1/4 Ikipe ya Police FC yari yabujijwe igikombe cya shampionat na Marines i Rubavu, yaje kuyihimuraho maze iyitsinda ibitego 5 kuri 1 harimo ibitego bitatu byatsinzwe na rutahizamu Kagere Meddie. APR yo ikaba nta gitunguranye yari imaze gutsinda SEC Academy ibitego 3 – 1.

 

Imikino ya 1/4 cya MTN peace cup uko yagenze:

Kuwa gatatu

Mukura VS 0-0 AS Kigali

 

Kuwa kane

APR FC 3-1 SEC

Marines FC 1-5 Police FC

Kiyovu Sports 0-1 Rayon Sports

Imikino yo kwishyura iteganyijwe ku cyumweru tariki 24/06/2012.

Hatangimana Ange Eric
UM– USEKE.COM