Rubavu: Abarwanyi ba FDLR bari gutaha ari benshi

Mu byumweru bibiri bishize, abahoze ari abarwanyi  b’umutwe  wa FDLR ukorerera  mashyamba yo muri    Repubulika Iharanira Demokarasi ya Kongo, bakomeje gutahuka ari benshi, mu gihe  byari bimenyerewe ko batahuka kabiri mu cyumweru ariko muri iki gihe, batahuka hafi buri munsi.

Kalisa Augustin, umukozi wa Komisiyo y’igihugu ishinzwe gusubiza mu buzima busanzwe abari abasirikare, yavuze ko mu byumweru bibiri bishize, abatahuka biyongereye cyane, kandi noneho bakaba bazana n’imiryango yabo.

Bamwe mu batahutse bavuga ko batashye ku bushake bwabo, abandi bakemeza ko impamvu nyamukuru yatumye batahuka, ari uko bari bamerewe nabi n’umutwe wa  Raia Mutomboki, utifuza umuntu wese uvuga Ikinyarwanda ku butaka bwa Congo.

Kaporali Niyibizi, yatahutse aturuka i Walikale, yavuze ko yafashe icyemezo cyo gutaha kuko umutwe wa Raia Mutomboki, bishatse kuvuga abenegihugu nyabo ba Congo, wahoraga ubahiga ngo ubice urubozo.

Uyu mu Kaporali avuga ko n’ubwo we yari umusirikari, yahoranaga impungenge z’uko abarwanyi b’uyu mutwe bazamumarira umuryango, nkuko yabonaga uko barimo bica abandi.

N’ubwo benshi bemeza ko batahutse kubera uyu mutwe, hari n’abandi bavuga ko ubu buri wese mu bagize FDLR, asigaye yibaza icyo yagezeho mu myaka yose amaze mu mashyamba ya Congo, bigatuma benshi bafata icyemezo cyo gutaha mu Rwanda.

Irankunda Josephine, ni umukecuru ariko yari akikiye akana k’amezi atatu, abereye nyirakuru, kuko nyina ukabyara bamwiciye muri Kongo, ako kana kakaza gutoragurwa  n’umwe mu barwanyi ba FDLR, ariko nako bagateye icumu mu rubavu, yavuze ko abona uriya mutwe wa Raia Mutomboki, ari nk’imperuka y’Abanyarwanda baba muri ako gace.
Kaporali zigama Simon uzwi ku izina rya Mwami, nkuko abivuga ngo akomoka i Gitarama muri Nyamabuye, akaba yarinjiye muri FDLR mu mwaka wa 1994, yavuze ko nta ruhare na ruto rw’intambara rwabaye kugira ngo afate icyemezo cyo gutahuka, kuko we yemeza ko yarwanye intambara nyinshi, iriya atariyo yari gutuma atahuka.

Ati:  “Kuba nariho mbyarira mu mashyamba, byatumye ndeba ahazaza h’abana banjye simpabone, niyo mpamvu nafashe icyemezo cyo kugaruka mu Rwanda, kugira ngo byibuze ndebe ko abo ndimo mbyara, hari icyo bazimarira mu gihe kizaza”.

Abaherutse gutaha ni abasirikare 9 harimo babiri bafite amapeti ya  Premier Sergent,  Sergent umwe, n’abakaporali 6, ndetse n’imiryango yabo igizwe n’abagore n’abana 22.

Abaje bahita bajyanwa mu Kigo cya Mutobo gishinzwe kubakira, nyuma bagahabwa uruhushya rwo kujya mu miryango yabo, nyuma yo guhabwa   ibizabatunga mu minsi ya mbere, ariko nyuma y’icyumweru abari abasirikari bakagaruka mu kigo, aho bigishwa imyuga itandukanye izabafasha kwibeshaho, ndetse bakabaha n’amafaranga y’imperekeza angana  180.000 y’Amanyarwanda.
Source:Izuba rirashe

Jean Paul Gashumba
UM– USEKE.COM