C. Ronaldo yahinduye insokozo mu gice cya kabiri

Muri ruhago igice cya mbere iyo kirangiye baruhuka gato bagahindura izamu batsindagamo, Ronaldo we ubwo Portugal yakinaga n’abadage yaruhutse gato ahindura n’insokozo ye.

Muri uyu mukino warangiye batsinzwe 1-0, Christiano Ronaldo uzi neza ko ari umwe mu bakinnyi bakurukiranywe na benshi muri iri rushanwa, amaringushyo ntayagira mu kibuga gusa no hanze yacyo ntiyoroshye.

Byanze bikunze ubwo abandi baba bahabwa amabwiriza yo gukurikiza mu gice cya kabiri, we aba afite iminota micye aza kumara ahindura uko yari yasokoje mu minota 45 ishize kugirango yinjire muyindi ari mushya.

Ejo bundi ubwo batsindwaga n’Ubudage nabwo yabifatiye akanya. Nyuma y’uko benshi bari batangariye n’ubundi isunzu yari yacongesheje yarisize n’amavuta abigenewe ahagije, hari n’uburyo yarisokojemo, mu gice cya kabiri yaje yarigoronzoye ukundi gushya, nubwo bitababujije gutsindwa.

Isunzu rirambitse ku mutwe mu minota 45 ya mbere, isunzu rishinze mu minota 45 yindi; kugirango avugwe kubyo yakoze mu kibuga banavuge no kumusatsi we.

Mu kibuga ntibyamuhiriye cyane kuko atabashije kugira byinshi akora, ariko isunzu rye ryo ryagarutsweho. Kuwa gatatu Portugal na Danemark ni ukureba niba azongera agahindura insokozo nyuma y’iminota 45.

Jean Paul Gashumba
UM– USEKE.COM