Guverneri wa Nord Kivu/DRC yasuye impunzi ziri i Nkamira

Impunzi z’abanyekongo zimaze guhungira mu Rwanda zaraye zigaragarije Guverineri wa Kivu y’Amajyaruguru Julien Paluku ko zitizeye igaruka ry’umutekano vuba mu duce zaturutsemo ku buryo zafata icyemezo cyo gutahuka.

Izi mpunzi ziri mu nkambi ya Nkamira zabigaragaje ejo ku cyumweru ubwo Guverineri wa Kivu y’Amajayaruguru yazisuraga, aje kureba imibereho yazo no kuzihanganisha.

Julien Paluku yavuze ko, Guverinoma ya Kongo yifatanije nabo mu kababaro ko kuba baravuye mu byabo bagahunga, ariko anabashishikariza gutaha vuba.

“nubwo tubona mu Rwanda babakiriye neza, ariko kuba impunzi tuziko bibababaje kuko mwasize imitungo yanyu, mwatandukanye n’abanyu, ubu abana banyu ntibari kwiga ariko twifatanije namwe kandi turabahumuriza” Julien Paluku

Paluku yabwiye impunzi ko Guverinoma iri gukora ibishoboka ngo ibibazo by’umutekano mucye birangizwe muri Kivu y’Amajyaruguru mu duce twa Masisi izi mpunzi zaturutsemo.

Paluku ati: “Mbere y’uko nza hano nanyuze mu duce twa Masisi tumwe na tumwe kandi nasanze nta mirwano ihari ku buryo none cyangwa ejo bundi, uwabishaka yafata icyemezo agataha.”

Paluku yavuze ko ibibera muri Kivu y’Amajyaruguru bitari byabonerwa izina. Kuba byakitwa intambara, ubushyamirane, imyivumbagatanyo cyangwa irindi zina ngo guverinoma iracyabitekerezaho. Yabwiye abanyamakuru kandi ko atatangaza nyir’abayazana w’ibi ngo nabyo biracyacukumburwa.

Amakuru y’igaruka ry’umutekano  impunzi zo ntiziyakozwa. Ibi byagaragariye mu bibazo babajije guverineri

Umwe mu babajije yagize ati” Ese umutekano mutwizeza wava mu ijuru aka kanya. Ntibishoboka, kuko ingabo za Leta ubwazo ziratwambura, zikatwica, FDLR irahari baraturira inka, nta mutekano mushobora kutwizeza. Haracyari impunzi zahunze muri 1997 zitarataha, none natwe ngo  dutahe?”

Izi mpunzi zavuze kandi ko nta mutekano zibona waba wagarutse mu bice zavuye kuko kuri iki cyumweru ubwo Julien Paluku yasuraga izi mpunzi, haje izindi 299 zabaruwe kuri uwo munsi, aba baje bakaba barujuje umubare w’impunzi 5700 ubu ziri mu nkambi ya Nkamira.

Ubusanzwe inkamabi ya Nkamira ifite ubushobozi bwo kwakira abantu 2600, uyu mubare ukaba umaze kwikuba 2.

MIDIMAR ifatanije na HCR n’indi miryango mpuzamahanga bakomeje gushaka uburyo iyo nkambi yakongererwa ubushobozi, mu gihe hagishakishwa indi nkambi bazimurirwamo, biragaye ko badashobora gutahuka   mu minsi ya vuba.

Ubu hamaze ubakwa amahema agera kuri 13 yiyongera kuri 19 yari asanzwe mu nkambi. Hongererwe imisarane n’amazi ndetse n’amashanyarazi akwirakwizwa mu nkambi. Ibi byose ni ukugira ngo umutekano wabahunze urindwe neza, muri iyi nkambi haboneke isuku ihagije.

Umubare w’abaforomo bakorera mu nkambi wariyongere, hashyizweho umuganga w’umudogiteri uzajya uza mu nkambi  incuro 2 mu cyumweru kugira ngo akurikirane ibibazo birenze ubushobozi bw’abafaoromo.

MIDIMAR yashyizeho abakozi bakora amasaha 24  bakira ndetse banandika impunzi, n’imodoka zikora ayo masaha kugira ngo abinjira bakirwe igihe cyose baziye.

Frederic Ntawukuriryayo
PR/MIDIMAR

UM– USEKE.COM