Kiyovu Sport yacyuye amanota atatu Rayon icyura amafaranga

Mu mukino w’umunsi wa 22 wa shampionat, ikipe ya Rayon Sport yari yakiriye Kiyovu Sport kuri stade Amahoro i Remera, umukino Rayon yari yaciye amafaranga 2 000 kwinjira ukicara ahasanzwe, waje kurangira itsinzwe igitego kimwe ku busa.

Abafana b’umupira basanzwe bamenyereye kwinjira bishyuye amafaranga 1 000, gusa kwishyuza 2 000Frw ntibyabujije abafana bagera nko ku 5 000 kwinjira kuri uyu mukino, bivuze ko Rayon yari yakiriye yaba hari icyo yacyuye.

Mu gihe Rayon yaba yacyuye agafaranga,  Kiyovu Sport yo yatahanye amanota 3 ku gitego cyatsinzwe na Simon Bakkabulindi mbere y’uko igice cya mbere kirangira.

Mu mukino wari ufunguye kandi unogeye ijisho ku mpande zombi, amakipe yagiye abona uburyo bwo gutsinda nyuma yo guhererekanya neza ariko gushyira umupira mu rucundura ntibikunde.

Ikipe ya Kiyovu Sport yagaragaje gukina neza kurusha ikipe ya Rayon Sport, byemejwe n’umutoza wa Rayon Sport Jean Marie Ntagwabira ko ikipe ye itari imeze neza kuko yakoze imyitozo kabiri gusa.

“ Iyo aba ari undi mutoza utihangana ntabwo yari gushyira ikipe mu kibuga, kuko iyi kipe yakoze imyitozo gake cyane, ndetse kubera ahanini ibibazo by’imishahara abakinnyi bagiye mu kibuga bafite ntabwo ikipe yari ihagaze neza” Jean Marie Ntagwabira.

Ku mutoza Kayiranga Baptiste wa Kiyovu yemeza ko nubwo ikipe ya Rayon Sport yari ifite ibibazo, ariko itamworoheye, yagaye abakinnyi be b’imbere ku buryo bwinshi bahushije bwo gutsinda ibitego, ashimira cyane ba myugariro be bahagaze neza imbere ya ba rutahizamu Bokota Labama na Sina Jerome ba Rayon.

Ababanjemo muri Rayon Sport: Nizeyimana Alphonse (GK), Sibomana Abouba, Mwiseneza Jamal, Nshimiyimana Iddy, Nizigiyimana Karim(C), Ndayisenga Mbanyi, Kamanzi Papy, Ndayisaba Frolibert, Bokota Labama, Cerdic Hamiss na Sina Jerome.

Ababanjemo muri Kiyovu Sport: Shamiro Batte (GK), Myango Ombeni, Simon Nyamugenda, Katerega Godfrey, Ngirimana Alexis, Shyaka Jean, Serugaba Eric (C), Sibomana Hussein, Julius Bakkabulindi, Djabir Mutarambirwa, Simon Okwi.

Amanota atatu Kiyovu Sport yabonye ntiyatumye iva ku mwanya wa 5 yari iriho, ariko ikaba yagize amanota 35, ubu irarushwa inota 1 na Mukura ya kane, ariko ikina kuri iki cyumweru na Nyanza FC.

Mu wundi mukino wabaye AS Kigali   yatsinze    3-1  cya La Jeunesse

Imikino yabaye ku cyumweru tariki  22/04/2012

APR       2-0  Amagaju
Mukura       5-0  Nyanza
Marines       3-0  Espoir

 Police ntabwo yakinnye umukino yari ifite n’Isonga (uzakinwa kuwa gatatu tariki  25 Mata)

Urutonde rw’agateganyo

Police FC        20        13        2          5          32        12        20        44 Pts

APR FC          19        12        3          4          39        16        23        40 Pts

Mukura VS     20        11        3          6          27        13        14        39 Pts

Rayon Sport    20        10        3          7          33        18        15        37 Pts

Kiyovu FC      20        10        6          4          25        19        6          35 Pts

Isonga FC       20        9          5          6          24        20        4          30 Pts

Etincelle FC    21        6          8          7          21        24        -3         25 Pts

Marine FC       22        6          9          7          21        30        -9         25 Pts

As Kigali FC   22        6          13        3          19        34        -15       24 Pts

La Jeunesse     21        7          12        2          21        30        -9         23 Pts

Amagaju FC    21        5          10        6          15        27        -12       20 Pts

Nyanza FC      21        4          12        5          14        27        -13       17 Pts

Espoir FC        19        1          14        4          16        38        -22       7 Pts

Photo: Hatangimana A

Hatangimana Ange Eric
UM– USEKE.COM