“Nta mahirwe na make tuzaha abashyigikira Genocide” – Kagame

07 Mata – Kuri Stade Amahoro i Remera ahari hakoraniye imbaga y’abantu, habereye imihango yo wibuka u nshuro ya 18 Genocide yakorewe abatutsi mu 1994,  President Kagame yasezeranyije abanyarwanda ko Leta y’u Rwanda itazaha amahirwe na make abashyigikiye Genocide n’abayikoze yo gusubiza inyuma u  Rwanda .

Muri uyu muhango wo kwibuka, hari intumwa z’ibihugu nk’Ubufaransa, Espagne, Tanzania, Uburundi n’ibindi bari baje kwifatanya n’abanyarwanda kwibuka.

Oswald Mwizerwa ukomoka mu karere ka Kayonza, Genocide yabaye afite imyaka 9, ubu yiga ikiciro cya gatatu cya Kaminuza (MA) muri Mount Kenya University, yatanze ubuhamya bw’uburyo abatutsi biciwe mu kiriziya cya Karubamba i Kayonza. We akaba yaratewe Grenade ikamuca akaguru, ndetse anaraswa akaboko k’iburyo mbere y’uko batabarwa n’ingabo za APR (RDF ubu), akaba ataratabawe ako kanya kuko yamaze iminsi ari mu mirambo nawe ameze nk’uwapfuye. Ibikomere akaba yarabivuriwe mu Ubufaransa.

“Naravuwe ibikira birakira, ibitarakira nabyo ubu nta kibazo ndatwaje. Nagumanye icyizere ndiga, ndangiza muri KIE, nkimara kurangiza nabonye akazi ko kuba umukuru w’ikigo cya College St christophore Rwinkwavu muri Kayonza. Ubu mfite indoto zo kuzashaka umugore mwiza nanjye nkagira umuryango, mfite indoto kandi zo kuzaba umuyobozi ukomeye muri iki gihugu. Indoto nziza mfite nizo nifuriza n’urubyiruko rugenzi rwanjye” Oswald Mwizerwa.

President Kagame mu ijambo rye yavuze ko ubu u Rwanda rufite imbaraga rutigeze rugira mbere, u Rwanda rwihagazeho ndetse rufite intego zo gukomeza gutera imbere muri byinshi, nyuma yo kwigira ku mateka mabi rwagize.

Yagaye cyane ibihugu byitwa ko biteye imbere mu burenganzira bwa muntu n’ibindi, bigicumbikiye abahekuye u Rwanda, bikaba bidashyira imbaraga mu kubashyikiriza Ubutabera.

Nyamara ngo ibyo bihugu iyo bihuye n’ibibazo by’iterabwoba, bikangurira Isi yose gushyira imbaraga mu kubafasha kubirwanya no gufata ababikoze. President Kagame akibaza impamvu bitaba no ku bihugu nk’u Rwanda iyo rutabarije ifatwa ry’abahekuye u Rwanda. Kuri we akemeza ko bigaragaza agaciro gake ibyo bihugu biha ubuzima bw’abanyafrica

“Bavandimwe banyarwanda nimureke dukomeze dutere imbere, buri wese yishakemo imbaraga zo kurenga ibibazo bitwugarije akorere kugira ubuzima akwiye” Paul Kagame.

President Kagame yabwiye abari aho ko, umwana warokotse Genocide, ubu ari mukuru. Yakuriye mu  gihugu aho buri mwana afite uburenganzira bungana n’ubwundi, aho abantu bangana imbere y’amategeko.

Yibukije ko nubwo amateka y’igihugu cy’u Rwanda ruyasangira n’amahanga n’umugabane wa Africa, ariko ari ay’abanyarwanda ukwabo. Ko ariyo mpamvu aribo areba kurusha undi wese.

Yanzuye asezeranya abanyarwanda ko abakoze Genocide n’abayihakana ubu, Leta y’u Rwanda itazabaha amahirwe n’amwe yo gusubiza u Rwanda inyuma.

Daddy Sadiki Rubangura
UM– USEKE.COM