Norway yataye muri yombi Umunyarwanda ukekwaho uruhare muri Jenoside

Igihugu cya Norway cyatangaje ko kuwa kabiri cyataye muri yombi umunyarwanda ukekwaho kugira uruhare muri Jenoside yakorewe Abatutsi mu 1994.
Kuri uyu wa kane, Urwego rw’igihugu cya Norway rushinzwe iperereza bita “Kripos” rwasohoye itangazo ruvuga ko kuwa kabiri rwataye muri yombi uyu mugabo uri mu kigero k’imyaka 50. Gusa, amazina ye ntiyatangajwe.
Uyu mugabo wafatiwe ahitwa Nordland, kuri uyu wa kane urukiko rw’akarere rwo mu mugi wa Oslo nibwo rwemeje ifungwa ry’agateganyo.
Mu itangazo NCIS yagize iti “Kripos yizeye ko hari impamvu ifatika yo gukeka ko uyu mugabo yaba yaragize uruhare mu kwica abantu benshi, cyane cyane b’Abatutsi.”
Kipros yatangaje ko uyu mugabo agiye gufungwa ibyumweru bine, bibiri muri byo akazaba ari mu kato adashobora gusurwa ndetse adashobora no kwakira amabaruwa yandikiwe.
NCIS yavuze ko uyu mugabo yageze muri Norway mu 2006 nk’impunzi, aza kubona ubwenegihugu bwa Norway mu 2014.
Umushinjacyaha Espen Hanken yatangaje ko guta muri yombi uyu mugabo hashingiwe ku makuru yatanzwe n’u Rwanda n’ingenzo z’iperereza (investigative trips) bikoreye mu Rwanda, gusa ngo iperereza rirakomeje.
Hanken ati “iperereza ryinshi riracyakomeje, harimo no guhatwa ibibazo. Intego ni ukuzamuburanishiriza muri Norway (kuko yari yaramaze kubona ubwenegihugu bw’icyo gihugu).”
Polisi ya Norway yavuze ko mu 2017 yakoze ingendo eshatu mu Rwanda yikorera iperereza, ndetse ihura n’abatangabuhamya batandukanye ngo byatumye barushaho kumukeka.
Umunyamategeko Brynjar Meling uri kunganira uyu mugabo watawe muri yombi we yahakanye ibyo umukiriya we aregwa, avuga ko nta ruhare na ruto yagize muri Jenoside.
Ubushinjcyaha na Polisi bavuga ko iperereza kubyo uyu mugabo ashinjwa rigoye cyane kubera ko ibimenyetsi n’amakuru bigenda bisaza kubera ko hashize imyaka myinshi, bagasaba ubufatanye n’u Rwanda ndetse n’ibindi bihugu byaba byarakoze iperereza ku byaha nk’ibi.
UM– USEKE.RW