KIYOVU yananiwe gutsinda Simba SC

18 Gashyantare – Kuri Stade ya Kigali i Nyamirambo, Kiyovu Sport imbere y’abafana bayo, ntibashije kwegukana amanota atatu imbere ya Simba Sport Club yo muri Tanzania, umukino urangiye amakipe yombi anganyije 1-1.

Wari umukino ubanziriza uzabera i Dar es Salaam wo mu makipe yabaye ayambere iwayo, CAF Confederation cup. Ikipe ya Kiyovu ikaba yabuze uburyo bwinshi bwari kuyiha impamba ifatika izajyana muri Tanzania mu mukino wo kwishyura.

Mu minota 25 ya mbere, rutahizamu wa Kiyovu Julius Bakabulindi yari amaze kubura uburyo nka bubiri bwo guha ikipe ye n’abakunzi bayo, bari benshi i Nyamirambo, igitego.

Nyuma yo gukora amakosa menshi hagati mu kibuga ku bakinnyi nka Shyaka Jean, Jabir Mutarambirwa na Murengezi Rodriguez bari hagati ikipe ya Simba yaje kubakosora.

Ku munota wa 39 Mwini Kazimoto wa Simba yarekuye ishoti mu ntambwe nka 30 uvuye ku izamu rya Pascal Dukuzeyezu wa kiyovu ntiyagira icyo arikoraho kijyamo, igice cya mbere kirangira Simba iri imbere.

Mu gice cya kabiri, umutoza Kayiranga Baptista yahinduye ibintu, yicaza Murengezi, Mutarabirwa n’umuganda aherutse kuzana Mayanja Nelly batagaragaye muri uyu mukino, ashyiramo Ndayishimiye Yousuf bita Kabishi, Simon Okwi na myugariro Ombeni wahise utuma Eric Serugaba wakinaga inyuma ajya imbere.

Kiyovu yisubiyeho itera umupira, ibona n’ubundi buryo bwo gutsinda, ku munota wa 71 nibwo Ndayishimiye Yusuf n’umutwe yishyuye igitego ku mupira mwiza yahawe na Ombeni. Kiyovu yakomeje gusatira ariko ba myugariro Juma Nyoso, Nassor Masoud Said, Kelvin Patrick Yondani  n’umuzamu Juma Kaseja bagahagarara neza.

Umukino warinze urangira ari igitego kimwe kuri kimwe.

Ku mutoza Kayiranga Baptista, mu kiganiro n’abanyamakuru yagize ati: “Abakinnyi banjye babuze amahirwe menshi hano, ariko uko tunganyije nabo hano, ni nako iwabo utamenya uko bizagenda”

Uyu mukino wasifuwe n’umusifuzi NKURUNZIZA w’umurundi na bagenzi be ukaba warangiye nta karita n’imwe, yaba umuhondo cyangwa umutuku itanzwe.

I Nairobi, ikipe ya APR nayo ikaba yahanganyirije na Tusker FC ubusa ku busa mu mukino wa Orange CAF Champions league.

Ange Eric HATANGIMANA
UM– USEKE.COM