Adele, umuziki wamuvanye mu kazu yacumbikagamo na Nyina umugeza muri Villa

Uyu mwongerezakazi yamenyekanye vuba vuba kubera ubuhanga bwe n’ijwi ridasanzwe mu kuririmba, kugeza aho ku cyumweru gishize yegukanya ibihembo bya Grammy bitandatu wenyine.

Ubu ari kuba mu nzu y’agatangaza, ifite ikibanza cya hegitari 10, piscines ebyiri n’umwihariko wo kuba iri ahantu heza cyane.

Adele Adkins yarezwe na nyina gusa mu nzu nto bakodesha (Apartements) mu mujyi wa Londres, kugeza no mu minsi ye ya mbere yo kumenyekana no kugurisha ibihangano bye byinshi cyane, yari akibanira na Nyina muri iyo nzu iciriritse bakodeshaga.

Ubwo yavaga mu nzu yakodeshwaga na nyina, nabwo ngo yagiye kwibera mu kazu k’icyumba kimwe. Nyuma yo kwegukana Grammys esheshatu wenyine ku cyumweru gishize, yatunguye abantu yimukira mu nzu y’agatangaza akodesha ibihumbi £15,000 buri kwezi (ni hafi 15 000 000 z’amanyarwanda)

Ku myaka 23, uyu muhanzi umaze kuba ikirangirire muri Londres no mu bakunzi ba muzika ku Isi, ubu yimukiye munzu ya Villa yo mu nzuri z’ahitwa West Sussex, inzu ifite ibyumba birenga 10, piscines ebyiri, ikibuga cya Tennis n’ibindi bintu by’agatangaza byinshi.

Adele yagaragarije iyi nzu y’agatangaza umunyamakuru wa USTV kuri uyu wa gatatu. Abajijwe icyo azayikoreramo kuko ari nini cyane, amubwira ko ibyumba bigera ku 9 byose bitazakoreshwa urebye.

Uyu mukobwa utazi se kuko yamutanye na nyina ari muto akaba yagize ati: “Mubonye icyo nakora ni ukumucira mu maso gusa”

Uyu muririmbyikazi wabaye umuririmbyi wa 2011 kubwa Billboard yo muri US, yavukiye i Tottenham mu majyaruguru y’urusisiro rwa Londres mu 1988.

Iyi nzu akodesha yubatswe mu kinyejana cya 19 nk’inzu y’abihaye Imana, mu 2004 yagurishijwe miliyoni £1.8, ubu ifite agaciro ka miliyoni £6 z’amapound akoreshwa mu bwongereza.

Adele Laurie Blue Adkins uvuga ko ateganya kuzayigondera (kuyigura) ba nyirayo nibabyifuza. Adele ni umuririmbyikazi wabitangiye afite imyaka ine gusa, yakundaga kuririmba agorora ijwi, ubu niryo benshi bamukundira kuko ari umwihariko we. Avuga ko abamuhaye urugero (inspiration) muri muzika ye ari abitwaga “Spice Girls”.

Afite imyaka 16, yatunganyije indirimbo ye ya mbere yitwa “Hometown Glory” muri studio. Uyu muhanzikazi akaba yararangije Kaminuza mu ishami ry’ubugeni n’ikoranabuhanga muri BRIT School for Performing Arts & Technology, aha akaba yariganaga na Leona Lewis na Jessie J nabo bazwi muri muzika.

Nubwo ubu yimutse atagituye mu majyaruguru ya Londres, Adele Adkins ni umufana ukomeye w’ikipe ya Tottenham Hotspur aho yavukiye.

Adele yabajijwe impamvu abyibushye cyane kandi akiri muto asubiza ati: ” Niyo napima toni ariko nkakora Album nziza cyane, byandutira kungana na Nicole Richie ngakora Album y’amafuti. Intego yanjye si ukuba gato”

Source: Dailymail

Ubwanditsi
UM– USEKE.COM