Charles TIBINGANA ntagikiniye ISONGA

Amakuru atangazwa n’ubuyobozi bw’ikipe y’Isonga FC ni uko umukinnyi Charles Tibingana Mwesigye atazakinira ikipe y’Isonga FC isanzwemo bagenzi be bakinanye imikino y’igikombe cy’Isi cy’abatarengeje imyaka 17 umwaka ushize muri Mexique.

Ubuyobozi bw’Isonga FC bukaba bwari mu biganiro n’ikipe ya Proline Academy ari nayo uyu musore w’imyaka 18, yahamagawe no mu mavubi makuru aturukamo.

Charles Tibingana, umunyarwanda wavukiye akanakurira muri Uganda we na mugenzi we Andrew Buteera, ikipe ya Isonga FC, yifuzaga ko bazakinira iyi kipe, ikaba imaze igihe ibisaba ubuyobozi bwa Proline y’i Kampala yareze aba bahungu.

Proline Academy aho guha Isonga FC umukinnyi Tibingana, yabahaye abasore babiri bazwi ku mazina ya Aziz (rutahizamu) na Emmanuel (myugariro). Aba bakazagera i Kigali mu minsi ya mbere y’isubukurwa rya Shampionat yo mu Rwanda.

Kuri Andrew Buteera wagiye kuvurwa Ivi mu gihugu cy’Ubufaransa, akaba yaramaze kubagwa nkuko ubuyobozi bwa ISONGA FC bubitangaza. Ubu akaba ari gukorerwa isubirana (Rehabilitation) mu kigo cya Clairfontaine i Paris.

Andrew Buteera we bikaba bitaramenyekana niba azakomeza gukinira ikipe ya Proline Academy cyangwa azaza gukinira Isonga FC, hakaba hategerejwe ko abanza agakira maze ibiganiro bigasubukurwa hagati y’amakipe yombi.

Andrew Buteera nawe ukinira ikipe y’igihugu Amavubi, biteganyijwe ko azagaruka mu Rwanda tariki 26 Werurwe. Ivi rye ariko ngo rizakira nyuma y’amezi atanu cyangwa atandatu.

UM– USEKE.COM