Rayon Sport yahembye abakinnyi igice ngo bagaruke ku kazi

Nyuma y’uko abakinnyi ba Rayon bahagaritse imyitozo kubera ko batarahabwa umushahara wabo w’ukwezi k’Ukuboza 2011 na Mutarama 2012,  amakuru twahawe na bamwe mu bakinnyi ba Rayon  aremeza ko baraye bahawe agashahara k’Ukuboza ngo bagaruke ku kazi kabo.

Uyu mushahara w’ukwezi kumwe abakinnyi bawakiriye nyuma yo kumvikana (negociations) hagati y’abakinnyi ndetse n’abanyamuryango ba Rayon bita “Imena za Rayon” ari nabo bishakishijemo aka gashahara.

Abakinnyi ba Rayon bakaba bari banze gusubira mu myitozo ndetse no gukina umukino bakina kuri iki cyumweru n’ikipe y’Amagaju kuri stade Amahoro badahawe ibyo bagombwa n’ikipe.

Abakinnyi b’abanyamahanga ba Rayon Sport bakaba bari batangaje ko niba nta gikozwe bo baza kwisubirira iwabo kuri uyu wa gatandatu kuko ubuzima muri Kigali butaborohera mu gihe badahembwa.

Umushahara w’ukwezi kwa 12/2011 baraye bagejejweho n’IMENA za Rayon, ukaba utarangije ikibazo neza kuko abakinnyi batahembwe Mutarama. Ni mu gihe umukino w’umunsi wa 11 ukinwa  none ari usoza igice cya mbere cya shampionat (phase Aller)

Rayon ihemba miliyoni 8 zirenga z’amanyarwanda buri kwezi, ubu iri ku mwanya wa gatanu by’agateganyo. Umwe mu bakinnyi bayo utashatse ko amazina ye yandikwa aha, yatangarije UM– USEKE.COM ko ikibazo kitarangiye kuko Phase retour batazayitangira batabonye umushahara wabo. Gashyantare nayo izaba iri kurangira cyangwa yararangiye dore ko igihe Phese retour izatangirira kitaramenyekana.

Mu gihe bahabwaga umushahara w’Ukuboza,  IMENA za Rayon zikaba zijeje abakinnyi ko, umushahara wa Mutarama nawo uzaba warabonetse mbere y’uko Phase Retour itangira.

Abanyamuryango ba Rayon bitwa IMENA bakaba bishatsemo uyu mushahara w’abakinnyi batabifashijwemo n’umufatanyabikorwa wabo Contact FM ihagarariwe na Albert Rudatsimburwa nkuko amakuru atugeraho abyemeza.

UM– USEKE.COM