Urukiko rwategetse ko abari abayobozi ba ADEPR bakomeza gufungwa

Kimihurura – Urukiko rukuru rwa Kigali kuri uyu wa kane rwategetse ko abari abayobozi b’itorero ADEPR bakomeza gufungwa iminsi 30 by’agateganyo kuko ubujurire bwabo nta shingiro bufite. Aba uko ari batandatu baregwa kunyereza amafranga agera kuri miliyari eshatu z’iri torero.

Ibyaha baregwa ngo biraremereye bityo ntibarekurwa ngo bakurikiranwe bari hanze nk’uko byavuzwe n’umucamanza.

Uwari umucungamutungo w’iri torero Christine Mutuyemariya mu rukiko rwisumbuye yari yavuze ko yagiye asinyishwa amasheki ku ngufu bityo adakwiye kubiryozwa.

Tom Rwagasana wari Umuvugizi wungirije w’Itorero yari yasabye gukurikiranwa ari hanze kuko arwaye umugongo.

Ibi byose ariko umucamanza yavuze ko bidatanga impamvu zo kuba barekurwa bagakurikiranwa badafunze. Avuga ko nko kuri Tom Rwagasana we yakwivuriza aho afungiye kuko ngo no muri gereza abariyo bavurwa.

Umucamanza yavuze ko bahereye ku bimenyetso byatanzwe n’ubushinjacyaha babonamo impamvu zishobora kugira icyaha bityo abaregwa bakomeza gukurikiranwa bafunze mu gihe ibindi bimenyetso bigishakishwa.

Abaregwa bose hamwe ni Tom Rwagasana, Sebagabo Leonard, Mme Christine Mutuyemariya, , Eng. Sindayigaya, Niyitanga Salton na Gasana.

Mu cyumweru gishize aba bari abayobozi ba ADEPR bahamagajwe mu muhango w’ihererekanyabubasha n’ababasimbuye ku kicaro cya ADEPR ariko babasha kuburizamo uyu muhango bavuga ko batiteguye.

Ikiciro kizakurikiraho ni ukuburanisha urubanza mu mizi kuri aba batandatu baregwa.

UM– USEKE.RW