EDPRS II: “Guhashya ubukene biri mu Rwanda ni urugero kuri Africa” Prof. Paul Collier

7 Gashyantare 2012 – Muri Serena Hotel herekanywe ibyagezweho n’ikiciro cya kabiri cya  gahunda ya Leta y’iterambere no kurwanya ubukene, EDPRS II (Economic Development and Poverty Reduction Strategy)

Imbere ya President Paul Kagame n’abatumirwa binzego zitandukanye, Ministeri y’Imari n’igenamigambi n’ikigo cy’igihugu cy’ibarurishamibare nibo bagomba kubyerekana.

Ministre John Rwangombwa yagaragaje ko mu myaka itanu ishize (2005-2010) ubukene mu Rwanda bwagabanutse ku buryo bugaragara, kandi habayeho iterambere mu mibereho y’abararwanda.

Ushinzwe ibarurishamibare, Yussouf MURANGWA yavuze ko ubushakashatsi bwakozwe n’ikigo cy’igihugu cy’ibarurishamibare bwagaragaje ko umubare w’abana bagana ishuri wikubye kabiri hagati ya 2005 na 2010.

Mu 1994 umubare w’abakene mu Rwanda wari 77,8%, kugeza mu 2010 umubare w’abakennye mu Rwanda waragabanutse ugera kuri 44,9%. Iyi ngo ni intambwe ndende yatewe mu guhashya ubukene mu banyarwanda.

Ibi byagarutsweho Prof. Paul Collier,  ukuriye ikigo cy’ubushakashatsi ku bukungu bwa Africa muri University of Oxford, wavuze ko intambwe u Rwanda rwateye ari ntagereranywa, ukurikije imiterere yarwo n’amateka yarwo.

“Iterambere no guhashya ubukene u Rwanda rugezeho, ni urugero ku bindi bihugu bya Africa, ntahandi biraba uretse mu Rwanda” Prof. Paul Collier

Uyu muhanga yavuze ko hari n’ibindi byinshi bikeneye gukorwa, ariko ko inzira u Rwanda rurimo itanga icyizere mu kwikemurira ibibazo.

Yagize ati: “Nakoranye na Leta nyinshi cyane muri Africa, ariko umurava n’ubushake bwo guhangana n’ubukene u Rwanda rufite nta handi nabibonye. Iyo nza kuba muganga nari kubabwira ko nta ndwara murwaye, mukomereze aho”

Mubyo yasabye ko nabyo byakorwa, yavuze ko iterambere mu Rwanda risigaye no kugera mu cyaro ku muvuduko umwe n’uwo mu mijyi, nubwo ngo imijyi ariyo ‘moteur’ y’iterambere mu byaro.

Mu byarekanywe mu mibare n’ikigo cy’ibarurishamibare kandi, ni uko impfu z’abana cyangwa ababyeyi mu gihe cyo kwibaruka zagabanutse cyane mu myaka itanu ishize, kuringaniza imbyaro nabyo bikazamuka kuva kuri 25% by’imiryango yakoreshaga uburyo nibura bumwe bwo kuringaniza imbyaro mu 2005 kugeza kuri 45% mu 2010.

President Paul Kagame mu ijambo rigufi yashyikirije abari aho yagize ati: “Turahangayitse, ariko duhangayitse neza kuko twishimira ibyagezweho, tuzi neza ko akazi ko gukora kakiri kenshi. Twashyize imbaraga mu myaka itanu ishize kugirango abaturarwanda bagere ku iterambere, tuzakomeza”

Kugira ngo ibi bigerweho President Kagame abona byaratewe n’ibi bintu bitatu;

–          Guha ubushobozi abaturage ngo bagire uruhare muri gahunda ya EDPRS

–          Kwishyira hamwe ngo abantu bagire icyo bageraho

–          Abantu bivanyemo ubwoba bw’Ubukene, bumva ko bagiye guhangana nabwo.

Ibi n’izindi gahunda zirimo guteza imbere no korohereza ishoramari, abaturage bagakangukira imirimo itari ubuhinzi gusa, nibikomeza ngo 90% abanyarwanda bazagera ku cyerekezo 2020, byose ariko byubakiye ku mahoro n’umutekano nkuko byatangajwe na President Kagame.

Photos: Sadiki Daddy/PPU

Ange Eric Hatangimana/Daddy SADIKI RUBANGURA
UM– USEKE.COM