Abaturage babajije Urwego rw’Umuvunyi akarengane bakorewe

Mu Rwanda imiryango imwe n’imwe ifite ibibazo bitandukanye, byinshi usanga ari impaka zishingiye ku mitungo,  izungurwa, amasambu… ibindi bikaba akarengane kabaye hagati y’abaturanyi kadashingiye ku mitungo.

Bimwe muri ibi bibazo biba byarakemukiye mu nzego z’ibanze ntibinyure banyirabyo, ibindi ugasanga ntacyo ubuyobozi bw’ibanze bwabikozeho.

Mu cyumweru cyahariwe kurwanya akarengane cyateguwe n’Urwego rw’Umuvunyi, kuri uyu wambere tariki 23, abakozi b’uru rwego bagiye mu murenge wa Kimironko, Akarere ka Gasabo kumva ibibazo by’abaturage no gutangiza iki cyumweru mu gihugu hose ku mugaragaro.

Ibibazo byagiye bibazwa n’abaturage, byinshi ubuyobozi bw’ibanze bwarabikemuye mu buryo butanogeye abaturage.

Ibi bibazo byari ahanini akarengane abaturage bavuga ko bakorewe n’izo nzego, cyangwa amakimbirane hagati y’abaturanyi.

Umuturage witwa Mukamana Faidha, yaregeye Umuvunyi ko mu 2003 yambuwe isambu n’Akarere ka Gasabo ubwo bahubakaga amashuri abanza ahitwa Kimironko ya mbere, akavuga ko nta ngurane yahawe yisambu ye yubatswemo amashuri.

Naho umugabo witwa Leonard KUBWABO, we akomoka mu karere ka Nyarugu mu Ntara y’amajyepfo, we ayregeye Umuvunyi ko yacitse ikiganza ubwo yakoreraga uwitwa Karanganwa muri Atelier y’imbaho, inkiko ngo zanzuye ko KUBWABO ahabwa miliyoni 11 ariko ngo nubu ntacyo arabona.

KUBWABO yatangarije UM– USEKE.COM ko Urwego rw’Umuvunyi rwabanje kumuhuza n’uwari umukoresha we, bakemeranya ko azamwishyura ariko n’ubu ngo ntaramwishyura.

Karanganwa wamukoreshaga ngo yumva yamuha miliyoni imwe y’amanyarwanda, andi akazayamushakira. Urwego rw’Umuvunyi rukaba rwijeje KUBWABO ko rugiye kongera guhagurukira ikibazo cye.

Bamwe mu baturage twaganiriye nyuma y’ibi bibazo, badutangarije ko Urwego rw’Umuvunyi rukora neza cyane, ariko rukibura ingufu mu mategeko zo gufata ibyemezo ku karengane aho kagaragaye.

Umuvunyi Mukuru wungirije Nzindukiyimana Augustin, we yadutangarije ko mu rwego rw’amategeko urwego rufite ingufu.

Nzindukiyimana ati : « Ntakibazo dufite, duhabwa ingufu n’itegeko rishyiraho Urwego ».

Muri iki cyumweru cyahariwe kurwanya akarengane, Urwego rw’Umuvunyi rwiyemeje gusanga abaturage mu tugali mu kuborohereza abafite ibibazo gukora ingendo.

Abaturage baba bari aho ari benshi, bakaba nabo bagira uruhare mu gukemura bimwe mu bibazo bibarizwa aho na bagenzi babo. Ibindi binaniranye Urwego rw’Umuvunyi rubikorera ubuvugizi ndetse ruakanayobora abaturage inzira babinyuzamo.

Iyi gahunda ikazaba mu gihugu cyose, aho abakozi b’uru rwego bagomba kugera mu tugali dutandukanye bumva ibibazo bya rubanda.

Photos: Hatangimana/UM– USEKE.COM

HATANGIMANA Ange Eric
UM– USEKE.COM