Amanota y’ibizami bya Leta ku mashuri abanza na tronc commun yatangajwe

Ku biro by’inama y’igihugu y’ibizamini kuri uyu wa gatanu, nibwo hatangajwe kumugaragaro amanota yavuye mu bizami by’abanyeshuri bashoje ikiciro cy’amashuri abanza.

Dr.HAREBAMUNGU Mathias, Umunyamabanga wa Leta ushinzwe amashuri abanza n’ayisumbuye, yatangaje ko uyu mwaka umubare w’abatsinze wazamutse ugereranyije n’umwaka ushize.  Abanyeshuri bakoze ibizami bisoza amashuri abanza ni 154 957, 93% by’abari biyandikishije ngo bazakore.

Mu kiciro cy’amashuri y’imyaka 9 y’ibanze, abana bakoze ibizami ni 77 473, muri aba abatsinze ni 82,75%, umubare w’abatsinze ukaba  ugereranyije n’umwaka ushize aho hatsinze abagera kuri 82,64%.

Dr.HAREBAMUNGU Mathias yatangaje ko imibare igaragaza ko hatsinze abana benshi ugereranyije nuko byavugwaga ko batazatsinda kubera ihinduka ry’indimi bakozemo bava mu gifaransa bagakora mu cyongereza.

Kuva mu 2008, uburyo bwo gutanga amanota bwarahindutse, buva ku manota yatangwaga ku ijanisha, bujya ku mibare ya 1-9. Ufite 1 cyangwa 2 aba ari mu kiciro cyo hejuru (distinction) mu gihe uri muri 6,7 cyangwa 8 aba afite amanota yo hasi cyane.

Umunyeshuri wabaye uwambere mu gihugu  ni Mutoni Nancy wo mu kigo cya Kigali parents, naho ikigo cyambere mu gihugu cyabaye Les gazelles  cyo mu Karere ka Ngoma mu ntara y’iburasirazuba.

Muri tronc commun ikigo cya mbere mu bigo icumi  mu gihugu ni  New Life High School  yo mu karere ka  kayonza.

Ku banyeshuri bashaka kumenya amanita yabo, hari uburyo bwihuse bwashyizweho; ni ukujya ku rubuga rwa www.rnec.ac.rw bakajya ahanditse “New Results” bakuzuzamo neza numero bakoreyeho mu kizamini maze bakabona amanita babonye.

Amanita ku munyeshuri wakoze kandi araboneka hakoreshejwe telephone igendanwa, aho wandika ubutumwa burimo nimero wakoreyeho ikizamini maze ukayohereza kuri 489

Nyuma yo kumenya ibisubizo byabo, abanyeshuri b’ibi byiciro baramenyeshwa ko amasomo yabo azatangira tariki 6 Gashyantare uyu mwaka.

Abanyeshuri batanu ba mbere mu mashuri abanza ni aba:

–           Mutoni Nancy ( Kigali parents, Gasabo)

–          Twahirwa Roger ( New life Academy, Kayonza)

–          Niyibizi Erika Sonia ( Kigali parents, Gasabo)

–          Kayonga Musanabera Belise ( New life Academy, Kayonza)

–           Irumva Gedeon (Good Foundation)

Daddy Sadiki RUBANGURA
UM– USEKE.COM