Mutumbo Dikembe arashinjwa ubucuruzi bwa zahabu ya DRCongo

Umunye Congo wahoze ari igihangange  muri Basketball ya NBA, Dikembe Mutombo, ubu arashinjwa uruhare mu icuruzwa ritemewe rya zahabu iva muri Congo ijyanwa muri America.

Muri Werurwe 2011, indege (Private Jet) yafatiwe ku kibuga cy’indege cya Goma, irimo ibiro 400 (kg) bya Zahabu n’amadorari y’Amerika miliyoni 4 (4millions $) cash,  biza kujya gufungirwa muri Prison ya Makala i Kinshasa.

Iyi nkuru yaravuzwe cyane mu binyamakuru bya DRCongo na Amerika, nyamara ariko izina rya Mutombo Dikembe, ufatwa nk’intwari muri Congo, icyo gihe ntiryagaragaye muri iyi ‘Affaire’

Mu ntangiriro z’iki cyumweru nibwo Edward Carlos St. Mary, wahoze ari umusirikare wa Amerika, akaba ariwe wafashwe  i Goma agerageza kujyana iyo zahabu muri USA, yatangarije ikinyamakuru Houston Chronicle  ko Mutombo Dikembe ariwe wamufashaga muri iriya ‘Deal’ yo kuvana zahabu i Congo.

Edward Carlos avuga ko Mutombo, mu 2010 yegereye uruganda rw’iby’ingufu rw’umuherwe Kase Lawal rukorera muri Leta ya Texas, ngo amwereke uburyo bavana zahabu muri Congo.

Edward Carlos yatangaje ko uru ruganda rwaje kumwiyambaza ngo abe ariwe ukora igikorwa cyo kujya kuzana iyo mari muri DRCongo no kwishyura muri Cash.

Akavuga ko abifashijwemo na Mutombo Dikembe yakoze iki gikorwa ariko ntibyarangira kuko, indege yarimo yafatiwe i Goma, affair ntitungane ndetse bakanamufunga i Kinshasa igihe gito.

Ikinyamakuru l’observateur cyo muro Congo, icyo gihe cyanditse ko ingabo zitwaje intwaro za General Bosco NTAGANDA zafashije mu gucunga umutekano w’ibiro 400 (kg) bya Zahabu, bifite aho bihuriye na Mutombo, kugera bigeze i Goma mbere y’uko bifatwa ku kibuga cy’indege bijya muri Amerika.

Muri iki gihe ariko, Mutombo Dikembe ntiyavugwaga muri iyi dossier, kugeza ejo bundi bitangajwe na Eduard Carlos.

Amasezerano yari ayo kugeza ibiro 400 bya Zahabu mu mujyi wa Houston, bivuye mu burasirazuba bwa Congo, byitwa ko ari umutungo bwite wa Mutombo Dikembe.

Mutombo akaba yaragombaga kubona 30% ku mafaranga yari kuva kuri iyi Zahabu imaze gucuruzwa muri Amerika, ngo yari kubona agera kuri miliyoni 10 z’amadolari (US$).

Dikembe Mutombo Mpolondo Mukamba Jean-Jacques, uzwi cyane mu kurinda inkangara (defense) mu mukino wa Basketball mu makipe nka Houston Rockets, Denver Nuggets na Atlanta Hawks ubu agomba kwirinda akisobanura imbere y’ubutabera nibumuhamagaza mu minsi iri imbere.

Houston Chronicle, yanditse ko Mutombo ashobora kutabazwa gusa gufasha mu bucuruzi butemewe bwa Zahabu, ahubwo ko ashobora no kubazwa ubufatanye na Gen. Bosco Ntaganda, ushakishwa n’Umuryango w’Abibumbye kubera ibyaha ku nyoko muntu yakoreye muri Congo Kinshasa.

Mu byumweru bibiri bishize, FDLR yishe abaturage 42 na DRCongo, urupfu rwaba bantu, ngo rufite aho ruhuriye n’ibirombe bya zahabu biri hafi yaho biciwe FDLR yashakaga kwigengaho.

Ubwanditsi
UM– USEKE.COM