Abakobwa bari gutinyuka imyuga yitwaga iy’abagabo gusa

Hari imirimo nko kubaka hambere wasangaga ari umwihariko w’abagabo ariko ubu ibintu biri guhinduka, bamwe mu bakobwa  biga mu ishuri rikuru ry’ ubumenyngiro muri IPRC South by’umwihariko abize imyuga yaharirwaga abagabo ngo basanga nta mwuga w’abagabo gusa ubaho kuko n’abagore bayishoboye, bagasaba bagenzi babo guhindura imyumvire.

Ubu hari umubare ugereranyije w’Abakobwa bari kwiga imyuga nk’ubwubatsi, ububaji n’indi yakunze gukorwa n’abagabo gusa.

Devotha Kubwimana yarangije amashuri yisumbuye ahitamo gukomeza amasomo y’imyuga kuko yabonaga ariyo iri ku isoko kandi yanamufasha kwihangira umurimo byoroshye.

Ati “Nabonye ko buri munsi abubatsi baba bakenewe hose maze nza kwiga ibyo kubaka.”

Kubwimana avuga ko nta mukobwa ukwiye gutinya umwuga runaka ngo ni uw’abagabo kuko nabo ngo amaboko bakoresha ari abiri.

Dr Twabagira Barnabe umuyobozi wa IPRC-South nawe avuga ko abakobwa bashoboye kimwe n’abahungu kandi ko uko iminsi ishira ariko abakobwa barushaho kwiyongera mu mashuri y’imyuga n’ubumenyingiro.

Dr Twabagira ati “tugitangira iri shuri wasangaga muri Department ishuri ririmo abakobwa babiri gusa, ariko ubu usanga rwose ari nka 30, ibi biduha ikizere ko abakobwa nabo bamenye akamaro k’amasomo y’ubumenyingiro.”

Dr Twabagira avuga ko icyo bashaka kugeraho ari uko abakobwa nabo bagira ubwitabire nk’ubw’abahungu kuko bose bashoboye kimwe.

Mu mwaka w’amashuri wa 2015-2016,abakobwa barangije muri iri shuri rikuru ni 212 naho mu mwaka wa 2016-2017 abateganyije kurangiza ni 250.

Christine NDACYAYISENGA
UM– USEKE.RW/Huye