Perezida wa Azerbaijan yagize umugore we Visi Perezida

Ilham Aliyev Perezida wa Azerbaijan kuri uyu wa kabiri yagize Visi Perezida wa mbere umugore we, igikorwa cyafashwe nko gushyira ubutegetsi mu rugo rwabo muri iki gihugu gikungahaye cyane kuri Petrol mu burayi bw’iburasirazuba.

Perezida yabitangaje abicishije kuri Website ye ko umugore we Mehriban Aliyeva ari we Visi Perezida wa mbere wa Republika ya Azerbaijan.

Aliyeva w’imyaka 52 yari asanzwe ari umuntu ukomeye mu ishyaka riri ku butegetsi kuva mu 2005 ndetse akaba avugwaho ko bishoboka ko yazasimbura umugabo we wafashe ubutegetsi mu 2003 asimbuye se wari wapfuye.

Mehriban Aliyeva aheruka kuvugwa muri Wikileaks ko yajyaga muri Amerika kwibagisha ngo bamutunganye neza (cosmetic surgery) kandi akunda cyane kwambara imyenda y’igiciro kandi igezweho cyane.

Ubusanzwe uyu wagizwe Visi Perezida ni umuganga wize kuvura amaso.

Umugabo we Ilham Aliyev w’imyaka 55 mu 2013 yafashe indi manda ya gatatu y’imyaka itanu. Ubusanzwe ashimwa ko iki gihugu yagiteje imbere kubera gukoresha neza Petrol gifite kurusha mbere. Ubu kikaba kiri mu bihugu bya mbere biha ibindi Petrol mu Burayi.

Abamunenga bo bavuga ko yacecekesheje abatavuga rumwe nawe.

UM– USEKE.RW