Abakobwa basigajwe inyuma n’amateka babatera inda ntibabafashe kurera

*Nyiramatora abyaye gatatu ariko nta wo mubasigajwe inyuma n’amateka barabyarana *Abasore/abagabo bababuza kuvuga uwabateye inda, bakanabatera ubwoba
*Abana babaho nabi ba barerwa n’umubyeyi umwe ba se bidegembya

Ni ikibazo gisa n’icyahozeho ariko kidakunze kuvugwaho, mu basigajwe inyuma n’amateka hari abana benshi bavutse ku bagabo batari muri iyo miryango. Ahubwo bateye inda abakobwa cyangwa abagore bo mu basigajwe inyuma n’amateka ariko ntibafate inshingano yo kubafasha kurera. Abo mu mudugudu w’Uwintobo mu murenge wa Kibeho muri Nyaruguru babwiye akababaro kabo Umuseke….

Ababa muri uyu mudugudu bo ntabwo bamerewe neza n’ubuzima, batandukanye n’abo twasanze mu mudugudu w’ikitegererezo wa Nyamyumba mu murenge wa Mata nabo Umuseke uheruka gusura.

Mu miryango y’abasigajwe inyuma n’amateka aha k’Uwintobo uhasanga utwana twinshi twonka, incuke n’abageze igihe cy’amashuri abanza. Benshi ubabonaho ibimenyetso by’imibereho mibi, ba nyina ariko bemeza ko benshi muri aba bana bababyaranye n’abagabo n’abasore batari abasigajwe inyuma n’amateka.

Mu gihe abana babo bariho nabi barerwa n’umubyeyi umwe batazi ba se, abo babyeyi gito bo baba bidegembya barateye ubwoba abo bateye inda ko nibabavuga bazabagirira nabi cyane.

Imibereho mibi no kubafatirana n’ubujiji bituma benshi koko batarihingutsa ngo bavuge base babana, ahubwo bakihangana bakaba intwari bagasangira icyo babonye n’abana babyaye.

Iki kandi ngo si ikibazo bisangije kuko hari n’ahandi mu gihugu kiri. Aho abakobwa n’abagore bo muri iyi miryango babyara abo batateganyije muri ubu buryo, kandi bikaba ngombwa ko babarera bonyine. Kuri bamwe muri bo ariko batangiye kubibonamo ihohoterwa.

Nyiramatora Seraphine aba muri uyu mudugudu w’abasigajwe inyuma n’amateka witwa w’Uwintobo amaze kubyara abana batatu kuva ari umukobwa, bose ngo nta wo muri iyi miryango bigeze babyarana.

Ati “Nta mutwa turabyarana, ariko abo banyarwanda bose twabyaranye nta n’umwe umfasha kurera aba bana ahubwo banteye ubwoba ko ntagomba kubavuga. Ndirwariza nyine ubu.”

Consolate Musabimana nawe babana hano muri uyu mudugudu avuga ko aha iwabo hari abana benshi cyane bavutse muri ubu buryo ariko ba se badafasha uburere n’uburezi bwabo.

Aba bana bakura batazi ba se kandi bariho nabi kuko barerwa n’umubyeyi umwe, akenshi nawe udafite ubushobozi na bucye.

Benshi mu bakobwa muri uyu mudugudu ngo bajya gushakana n’abandi basigajwe inyuma n’amateka babyaye nibura nka kabiri cyangwa gatatu ku bo bita ‘abandi banyarwanda’. Ngo baba barabashukashutse bababeshya ko bashobora no kubatwara bakabagira abagore.

Senateri Kalimba Zephrin uhagarariye imiryango y’abasigajwe inyuma n’amateka mu Nteko ishingamategeko umutwe wa Sena yabwiye Umuseke ko iki ari ikibazo kigiterwa n’imyumvire no kudasobanukirwa uburenganzira bwabo.

Yemeza ariko ko azakora ubuvugizi kuri iki kibazo kugira ngo ababyaranye nabo babafashe no kurera.

KOPORWA umuryango uhanira uburenganzira bw’abasigajwe inyuma n’amateka wemeza ko iki kibazo gikomereye imiryango yabo, ndetse ngo hiyongeraho n’icy’abaterwa inda bataragera ku myaka y’ubukure.

Musabyimaba Yvonne umuhuzabikorwa w’umuryango COPORWA avuga ko ubu hari gahunda yatangijwe muri iki cyumweru yitwa “IHANIRO” yo kujya bigisha urubyiruko rwabo kwirindi ibibazo nk’ibi harimo no kubasobanurira uburenganzira bwabo.

Avuga ariko ko bamaze no kubarura abana bose bafite iki kibazo cyo gutereranwa n’umubyeyi umwe bakabigeza mu buyobozi bukabafasha gushakira abana uburenganzira bwabo.

Callixte NDUWAYO
UM– USEKE.RW