Zimbabwe: Pasitoro wavuze ko Mugabe azapfa uyu mwaka ari kuburana

Umupasitoro wavuze ko Perezida Robert Mugabe wa Zimbabwe azapfa mu kwezi kwa cumi uyu mwaka agahita atabwa muri yombi kuri uyu wa gatatu nibwo yagejejwe imbere y’urukiko.

Umuvugabutumwa Patrick Mugadza w’ahitwa Victoria Falls yabwiye abanyamakuru mu cyumweru gishize ko yakiriye ubuhanuzi buva ku Mana Perezida Mugabe azapfa mu kwezi kwa 10, 2017

Kuwa mbere w’iki cyumweru Police yahise imucakira ashinjwa ibyaha binyuranye birimo no kubahuka ibendera ry’igihugu.

Anashinjwa ariko icyaha cyo kubangamira umudendezo wa rubanda no gukora imyigaragambyo ye bwite itemewe kandi irwanya leta.

Abanyamategeko be bari guhangana n’ubushinjacyaha bagaragaza ko umukiliya wabo arengana.

Kuri uyu wa kane nabwo araburana.

Muri Zimbabwe hari abakunda gutabwa muri yombi bashinjwa kuvogera no gutuka Perezida Mugabe, gusa abenshi inkiko zirabarekura.

Kuva mu Ukuboza umwaka ushize, umukambwe Robert Mugabe we yibereye mu kiruhuko cy’umwaka muri Singapore. Gusa yanaciye muri Mali no mu Bushinwa muri iyi minsi.

UM– USEKE.RW