APR FC na Rayon Sports ni ishiraniro

Umukino urimo kuvugisha abantu benshi  ni ugiye guhuza APR FC na Rayon Sports ku munsi wa 14 wa shampiyona y’umupira w’amaguru mu Rwanda  Azam Rwanda Premier League (ARPL) kuri uyu wa gatandatu tariki 21 mutarama 2017 kuri Stade  Amahoro i Remera.

APR FC na Rayon Sports  ni amakipe ubu yugarijwe n’imvune mu gihe habura iminsi ibarirwa ku ntoki bagahura ku mukino w’ishiraniro.

Ku ruhande rwa Rayon  rutahizamu wayo Mussa Camara  utarakinye ku munsi wa 13 wa shampiyona igihe banganyaga na Etincelles 0-0 yagarutse mu kibuga akazakina  uyu mukino mu gihe  ba myugariro  Manzi Thierry na Ange Mutsinzi  bakiri  mu mvune.

Ku ruhande rwa APR FC Rushehangoga Michel  ukina muri ba myugariro yagarutse mu myitozo nyuma yo kugira  imvune y’umutsi wo mu itako yagiriye ku mukino baheruka gukina n’ikipe ya AS Kigali, ibi byatumye  adakina umukino  wa APR yatsinzemo Marines FC 2-0.

Onesme Twizerimana na Maxime Sekamana bamaze amezi atatu mu mvune bagarutse mu myitozo.  Ariko Muhadjiri  we wavunikiye mu myitozo  ntazakinira ikipe ye APR FC kuri uyu mukino biteganywa ko azamara  ibyumweru bitandatu adakina.

Shassir  Nahimana  umaze gutsinda ibitego 11 ari nawe uyoboye abandi muri iyi shampiyona mu gutaha izamu,  Pierrot Kwizera, Manishimwe Djabel Mussa  Camara nabo  bamaze gutsinda ibitego 6 ni bamwe mu bakinnyi  ba Rayon sport  bahagaze neza bashobora kugora ikipe ya APR FC .

APR FC nyuma yo kwihererana Marines FC ikayinyabika ibitego bibiri ku busa kuri stade Umuganda,  yasigaye mu mwiherero i Rubavu mu rwego rwo gutegura uyu mukino w’ishiraniro. APR FC ikaba igaruka i Kigali kuri uyu wa kane.

Biragoye kumenya umukinnyi wa APR FC wagora mukeba wayo Rayon sport  dore ko uwari we wese ashobora  gutungurana  atsinda ibitego, yaba Sibomana Patrick, Issa Bigirimana, abakinnyi bo hagati cyangwa ba myugariro babo bashobora guhindura ibintu.

Imikino ya shampiyona  Azam Rwanda Premier League  yerekanwa imbonankubone  (live)  kuri Azam TV

Muri iyi week end muzakurikirana:

Ku wa gatanu  ni  Police  FC izakira AS de Kigali kuri stade ya Kicukiro,
Ku wa gatandatu APR FC yisobanura na  Rayon sport  kuri stade Amahoro  Remera
Ku cyumweru ruzambikana hagati ya Kiyovu sport na Marines FC.

Uretse imikino ya shampionat kuri decodeurs za Azam TV ubonaho amashene menshi atundukanye y’amakuru imyidagaduro, ay’abana nandi menshi.

*********