Abadepite batunguwe n’inyubako z’ubucuruzi ziri kuzura i Muhanga

Mu ruzinduko itsinda ry’abadepite bagize Inteko Ishinga Amategeko y’u Rwanda bari gukorera mu turere tugize igihugu, abari mu karere ka Muhanga batangaje ko batunguwe n’inyubako z’ubucuruzi ziri kuzamuka n’izindi nshya zuzuye muri uyu mujyi. Ngo bizeye ko zizazamura ubukungu n’imibereho y’abahatuye.

Mu minsi 10 aba badepite bagiye kumara mu Karere ka Muhanga bagenzura ibikorwa by’ubukungu n’iterambere bifitiye akamaro abaturage, bavuga ko mu byo bamaze gusuzuma birimo uruganda rutunganya ifu y’ibigori, agakiriro, aho abagenzi bategeramo imodoka (Gare routière) ahateganyijwe kubakwa isoko rya kijyambere ndetse n’inzu z’ubucuruzi z’abikorera babona hari impinduka ikomeye muri aka karere.

Hon Annonciata Mukarugwiza uyoboye iri tsinda avuga ko urebye uko umujyi wa Muhanga wari umeze mu myaka ishize hari itandukaniro rigaragarira buri wese ubu.

Hon Mukarugwiza ati “Mu minsi mike tumaze muri aka Karere twasanze ibikorwa by’abikorera birimo gutera imbere, gusa turasaba ko imirimo yo kubaka gare n’agakiriro yihutishwa kuko hari abakeneye kuzikoreramo.»

Kakuze Odette umwe mu bacuruzi bakora intebe za kijyambere, avuga ko kuba ngo agakiriro na gare biri hafi yo kuzura bizafasha abacuruzi gukorera hamwe kuko ngo bari basanzwe bakora nk’abanyamwigendaho, aho buri wese yakoraga ukwe akanagorwa wenyine.

Kakuze ati “ndumva iki kibazo noneho kigiye kurangira.”

Uretse inyubako z’ubucuruzi ziri kubakwa i Muhanga aba badepite basuye ikibuga cy’indege zo mu bwoko bwa Drones kiri mu murenge wa Shyogwe, ikiraro gihuza  Akarere ka Muhanga n’aka Ruhango, inzu y’urubyiruko, imihanda ya kaburimbo yubatswe n’iri kubakwa, icumbi ry’abakobwa rifasha abatishoboye ryatanzwemo inkunga n’Umukuru w’igihugu Paul Kagame ndetse n’urugomero rwa Nyabarongo ruri mu murenge wa Mushishiro ubu rutanga Mw28 z’amashanyarazi ku gihugu.

MUHIZI Elisee
UM– USEKE.RW/Muhanga