Pastor Mpyisi yahishuye ubutwari bwa Kigeli V benshi batazi

*Mpyisi ati ‘mbabazwa n’uko Gitera Joseph yakoze byinshi ariko ntabe Perezida,…’
*Lumumba yemereye ikintu gikomeye Kigeli, Mpyisi yanze kukivuga kuko ngo kirakomeye
* Icyo kintu ngo cyari gutuma u Rwanda rwaguka
*Mpyisi yanenze bikomeye abakobwa b’u Rwanda babyina bambaye ubusa

Ubwo yafataga ijambo ngo avuge ku bigwi n’amateka by’Umwami Kigeli V Ndahindurwa washyinguwe i Mwima ya Nyanza kuri iki cyumweru tariki 15 Mutarama 2017, Pastor Ezra Mpyisi yavuze ko nubwo hari benshi batazi ibigwi by’Umwami Kigeli V ngo yakoze byinshi mu mateka kandi byagiriye Abanyarwanda benshi akamaro.

Kuri Pastor Ezra Mpyisi ngo Imana yanze ko Kigeli V Ndahindurwa ajugunywa ku gasi, ngo ni ibintu byo kuyishimira.

Yavuze amateka ya Yuhi IV  Musinga mbere yo kuvuga gato ku Mwami Mutara III Rudahigwa no kugaruka kuri Kigali V Ndahindurwa Jean Baptiste batabarizaga none, ngo yatangiye kumumenya ari agasore kugeza amutwaye muri America amuhungishije.

Mpyisi wavugaga ibigwi n’amateka akavangamo gusetsa no kwigisha ijambo ry’Imana, yavuze ko Umwami Musinga ari we se wa Kigeli V ibintu bikomeye yakoze harimo ko yanze gutanga igihugu ngo agihe Abazungu.

Abazungu baramubwiye ngo asinyire ko abahaye u Rwanda, ariko akazakomeza kurutegeka, undi ati “Nimbaha u Rwanda nzaba ntegeka iki?”

Referendumu ya mbere ngo ni Umwami Yuhi IV Musinga wasabye ko iba ubwo yasabaga Abazungu gutegura amatora basaba Abanyarwanda kwemera ko batanze igihugu cyabo. Gusa ibi ntibyabaye kugeza bamumenesheje mu gihugu cye.

Mutara III Rudahigwa (wasimbuye Musinga), Pastor Ezra Mpyisi yavuze ko yakoze ikintu gikomeye cyane cyo kuba yaratuye Imana u Rwanda, ngo ibyo yakoze ni byo bitumye u Rwanda rugituwe n’abantu ngo nta handi yabonye Umwami atura igihugu cye Imana.

Pasitoro Ezra Mpyisi kuri Kigeli V, yavuze ko ‘Ikintu cy’agahazo’ yakoze, ngo bitewe n’urukundo abantu bari bamufitiye, abato n’abakuru bamwibanditseho (kwishushanyaho ku mubiri) ku mubiri wabo, ngo “Urakabaho Urakarama.”

Mpyisi ati “Icyaha cyazanye icyago, asazira mu mahanga, ariko Imana ishimwe ko asezeweho iwabo i Nyanza. Ba Nyenyanza mwatwakiriye, mushime Imana ko Umwami agarutse iwanyu mukajya muza gusura umusezero we.”

Pastor Mpyisi wagaragaje ko yishimye cyane kuba Umugogo wa Kigeli warazanywe mu Rwanda, yashimiye by’umwihariko Musenyeri Anaclet ndetse avuga ko na we ari Umuhindiro (akomoka mu muryango w’ibwami).

Mushiki w’Umwami Kigeli V, Mukabayojo Speciose, Christine, Umwuzukuru w’Umwami Musinga, Angela na we ni umwuzukuru w’Umwami Musinga, Rudahigwa na Junior na bo b’Abuzukuru ba Musinga bari kumwe muri America basaba ko umugogo w’Umwami uzanwa mu Rwanda.

Mpyisi abonye umwe mu Bahindiro n’uko ashyenga, ati “Ni icyago dore uko areshya, Abahindiro bariho… uvuga ko bashize uwo si uwanjye!”

Mpyisi yasobanuye uburyo Umwami Kigeli V Ndahindurwa yatangiye gukora iby’ubutwari akiri muto.

Asetsa ati “Gitera yakoze ibintu bikomeye, icyambaje ntiyabaye Perezida ahubwo Perezida ararenga aba utaragize icyo akora.”

Uyu Gitera wavugwaga na Pastor Mpyisi ni umwe w’i Save ‘Gitera Joseph’ washinze ishyaka APROSOMA akanavugwa cyane muri PARIMEHUTU, uyu ngo yirirwaga atuka Umwami Rudahigwa, biramubabaza cyane ndetse umunsi umwe Rudahigwa ava i Nyanza ajya i Huye agambiriye kumukubita.

Ni ko gusanga Kigeli Ndahindurwa kuri Hotel Faucon, amubwira ikimukuye i Nyanza ko ari ugukubita Gitera.

Kigeli V Ndahindurwa ngo ni we wagize ubutwari bwo gutinyuka abaza Umwami Rudahigwa niba koko yabanje gutekereza kuri icyo cyemezo.

Ati “Nyagasani ibyo wabitekerejeho, gukubita icyo kigabo ko na we atari we afite abo akorera wagiye ugakubita abamukoresha.”

Umwami Rudahigwa yumviye umuvandimwe ahita abireka, niho havuye ya mvugo ngo “Aho kwica Gitera wakwica ikibimutera.”

Kuri ubwo butwari bwa Kigeli, Pastor Mpyisi yahise abaza ati “Ni nde muri mwe ubwiza ukuri umutware we, ko mugenda mugahakwa gusaaaaa.”

Yahise yungamo ati “Igitangaza Imana ikoze, aho Kigeli V agiye gutabarizwa ni naho yimiye ingoma. Yari agiye gutabarizwa iswa (mu mahanga), nabwiye abantu nti ‘Kigeli nadatabarizwa iruhande rwa Rudahigwa azahere iyo ngiyo’.”

Kigeli V Ndahindurwa ngo nta kibazo yagiranye n’abantu, haba mu Rwanda no mu mahanga ndetse ngo yahawe imidari myinshi, agahebuzo kaba uwo Perezida wa America Barack Obama yamuhaye amaze gutanga tariki ya 25 Ukuboza 2016, bityo ngo yabaye urugero rwiza rw’umuntu wasize izina ryiza.

Ezra Mpyisi ati “Izina ryiza riruta ubutunzi, riruta intebe apfuye atariki ku ntebe, nta mafaranga afite muri banki ariko ajyanye izina ritazibagirana.”

Kigeli V Ndahindurwa kandi ngo ni we wamanuye ibendera ry’Ababiligi i Kinshasa ubwo yari yatumweho na Ptrice Lumumba waharaniye ubwigenge bwa Kongo Kinshasa, akaba yari yamutumyeho nk’umuntu wari inshuti ya mukuru we Rudahigwa wari waratanze ingoma.

Kigeli V Ndahindurwa ngo yaragiye habuze umanura ibendera ry’Ababiligi, ararimanura aranarikandagira ati ‘undasa andase‘.

Icyo gihe Lumumba ngo yamusezeranyije ikintu gikomeye, Pastor Mpyisi ati “sinakivuga kuko kirakomeye, ….” arongera ati “Icyo kintu cyari gutuma u Rwanda rwaguka…”

Mpyisi kandi yanavuze kuri Benzinge.

Ngo mbere yakoze byiza kuko ari we bafatanyije kujyana Umwami Kigeli muri America bamuvanye muri Kenya nubwo nyuma yo gutanga kwe ari we waburanaga n’abo mu muryango we asaba ko umugogo w’Umwami utabarizwa muri America, ndetse akaba yaranimitse Umwami mushya witwa Bushayisha Emmanuel yise Yuhi VI.

Ubundi butwari bwa Kigeli V Ndahindurwa ngo ni uburyo yanze guhemuka yanga kwiyandarika, yanga gufata ubwenegihugu bwa America kandi ngo nibwo bari bamubwiye ko azabaho neza.

Ati “Umwami Musinga mu 1931 bamuciye (Abazungu) ibwami, none Kigeli V agaruwe ibwami, ni ikintu gikomeye.”

Uyu Mwami Kigeli V ngo hari benshi mu Banyarwanda batabona ubutwari bwe, ariko ngo muri Uganda bitewe n’ubucuti yari afitanye na Milton Obote wayoboye icyo gihugu, ngo byatumye Abanyarwanda bari impunzi borora inka nyinshi barakungahara, abana babo biga ku buntu muri Makerere University nta nkomyi, ndetse ngo ni we wagiye muri UN asaba ko Perezida Habyarimana Juvenal wategetse u Rwanda (1973-1994) yemera imishyikirano impunzi zigataha mu mahoro yanga ko hazapfa abantu benshi, undi arabyanga.

Pastor Mpyisi ati “Icyambabaje ni ukuba Pasiteri imyaka 60 nigisha Imana ariko ntayizi. Ikindi cyambabaje ni urupfu rw’Umwami Kigeli V wapfiriye mu mahanga adatashye mu Rwanda. Gusa Mpyisi nezezwa no kuba naramenye ko nari injiji muri Bibiliya. Ikindi kinenejeje ni uko Umwami Kigeli V atashye mu Rwanda.”

Mukabayojo Mushiki wa Kigeli nawe yavuze

Mu ijambo rigufi Mushiki wa Kigeli V Ndahindurwa, Speciose Mukabayojo (umukobwa wa Musinga) yagejeje ku bari aho, yashimiye inshuti z’umuryango harimo Ezra Mpyisi na Leta y’u Rwanda yabafashije muri gahunda zo gutahukana umugogo w’Umwami Kigeli V cyane cyane Perezida Paul Kagame.

Minisitiri w’Umuco na Siporo Uwacu Julienne we yavuze ijambo rigufi cyane ryo kwihanganisha umuryango w’Abahindiro ndetse avuga ko Leta izafasha uwo muryango.

Abandi Bami barimo Mwenda Mutebi Kabaka wa Uganda, J.William Katatumba wo muri Ankole Kingdom na bo bohereje ubutumwa ko bifatanyije n’umuryango w’Umwami Kigeli V Ndahindurwa n’abandi barimo n’abo muri Canada.

Amafoto/ISHIMWE Innocent/UM– USEKE

HATANGIMANA Ange Eric
UM– USEKE.RW