Episode 89: Eddy asabwe kuganira n’umukobwa nawe wifuza kuba Umubikira

Ubwo nabyutse mu gitondo ntera agapasi ubundi mfata inzira nerekeza kuri paruwasi ya Nyamirambo ngezeyo Misa iratangira, irangiye nkomereza kwa Padiri mukuru ngo mubaze uko byagenda nkajya mubandi bifuza kuba abapadiri.

Ninjiye mu ba mbere ngezemo nsangamo Padiri mukuru ampa karibu ndicara.

Padiri-“ Murakaza neza mwana wanjye”

Njyewe-“ Murakoze cyane  Padi”

Padiri-“ Yezu kristu akuzwe”

Njyewe-“Iteka ryose Padi”

Padiri-“Twishimira urubyiruko nkamwe ruza rutugana ngo rudufashe gutagatifuza imbaga y’Imana, urisanga. Twabafasha iki?”

Njyewe-“ Ni byiza cyane Padi, nanjye ni ishema ryanjye  ubu nje mbagana kuko nifuza gukorera Imana”

Padiri-“ Nuko nuko Mwana wanjye Imana ntabwo izagutenguha kandi ikunda abayigana, nonese wifuza kuyikorera gute ngo ngufashe?”

Njyewe-“ Ndifuza kugera ikirenge mu cyawe Padi nkaba Umusasaridoti iteka ngatura igitambokuri Artali ,ndetse ngakorera Imana kugeza mvuye mu mubiri kuko ari byo nabonye byampa umugisha ugeretse ku wundi nabuze”

Padiri-“ Imana ishimwe cyane, Yezu ntahwema gukora ibitangaza nkibi.”

Njyewe-“ Bisaba iki se ngo ninjire mu muryango wanyu Padi?”

Padiri-“ Bisaba kuba warize amashuri yisumbuye ugatsinda n’amanota meza, uri Umukristu w’indacyemwa mu mico no mumyifatire, utura ituro rya Kiliziya ndetse witeguye kuzapfa utabyaye kubera ingoma y’Imana”

Njyewe-“ Ndabyiteguye Padi, ahubwo byose ndabyujuje  ndasaba kuba nagenda vuba”

Padiri-“ Nuko nuko Mwana wanjye umuryango wacu ukwakiranye ibyishimo dore ugize n’amahirwe uje mu gihe gikwiye n’abandi bari bazagenda ejo ”

Njyewe-“ Murakoze cyane Padi”

Padiri-“Ngaho ihute ushake ibyangombwa mu muryangoremezo ubundi uzaze witeguye kugenda nuba wabibonye”

Njyewe-“ murakoze cyane Padi, reka ngende”

Narahagurutse nsezera Padiri, feri ya mbere nayifatiye muri quartier gushaka ibyemezo byageze nka saa tanu nsigaje gusinyisha ku muyobozi w’umuryangoremezo, ndetse nari narangije no gutura, nkomereza ku kazi ngo ntangire nkore akanyuma akandi ngasigire Rugira Imana ishobora byose.

Nimugoroba nahamage James duhurira murugo dutangira kuganira yewe na Kadogo nk’ibisanzwe sinamuheza.

Njyewe-“Bro, byakunze rero ibyangombwa byose nabibonye ejo ndagiye”

Kadogo-“ Eeeeh Boss ugiye mu buhinde kureba Jane?”

Njyewe-“ Oya Kado, ngiye kwiha Imana ahubwo nawe watangira kuba umuhereza mu gihe utari warangiza kwiga amashuri yawe nkazishimira kukubona umpereza nkuko unshyirira amazi muri douche ndetse ukantekera nkarya, rwose byaba ari byiza  niba wabikunda”

Kadogo-“ Eeeeh! Boss ntibishoboka! nonese koko ugiye kunsiga?”

Njyewe-“ Oya sinagusiga ahubwo nzagusigira James azakwitaho mu bihe byose”

James-“ Petit, Boss wawe yarangije gufata umwanzuro buriya ndamuzi kandi ndamusobanukiwe nubwo ntacyo twabihinduraho ariko gusa mbabajwe cyane nikibimuteye”

Njyewe-“ Ihangane James ikibinteye ni Imana yacyanditse kuri njyewe kandi kigomba gusohora kuko yabonye ariyo nzira yanjye yo kubona ijuru mugihe isi yananiye reka ngende maze muzavuge inkuru yanjye”

Kadogo-“ Mana weeee,ubu koko Boss wanyikuriye ku muhanda akanshyira murugo nkongera kwicara ku ntebe y’ishuri aransize?”

Njyewe-“ Kado ihangane utuze ube umugabo ndetse ube itwari yanjye, kuko niba ngiye kwiha Imana nayo izabaha ibyo nakagomye kubaha kuko isumba byose”

James-“ Kado humura,Boss ari serieux muri byose, umuntu niwe umenya ikimukwiye buriya yamenye nawe ikimukwiye ihangane agende  byose nzabikora,buriya  nabanye na Boss wawe kuva cyera kandi natoye imico ye myiza yantoje ejo namara kugenda turajyana  murugo ntangire  nkwiteho ikivi cye niyemeje kucyusa”

Byose byarasohoye James na Kadogo bantera amarira y’umutima bantunganyiriza imyenda nzajyana ubundi basoje duherekeza James twumvikana ko Sarah na Mama we nzaza kubibabwira nabaye Faratiri naho ku kazi ho nkazahaca ejo ngiye ngasobanurira President icyemezo nafashe nubwo bitemewe n’amategeko ya company ariko nkamubwira ko nabonye umuhamagaro wanjye nkaba ngiye gukorera Imana yo itanga byose kuko ariyo yandemye.

Nazindutse hakiri kare nkora ikimenyetso cy’umusaraba niragiza Imana ubundi Kadogo anshyirira amazi  muri Douche ndoga mvuyeyo nsanga James yahageze dusangira icyayi ubundi Kadogo aheka Bag tuzamuka ku  muhanda dufata Moto zijya aho nakoreraga tuhageze ba James barasigara ninjira mu biro  bya President akimbona mpetse igikapu arumirwa.

President-” Eeeeeh! aha nahe muhungu wanjye?”

Njyewe- ” Aha n’i Kibeho mu mwiherero w’abashaka kwiha Imana Papa”

President-” Inka yanjye!, uravugisha ukuri?”

Njyewe- ” Cyane rwose!”

President-” Ariko noneho byagucanze si gusa? usaze ungana utyo sha?”

Njyewe- ” Gusara ngana ntya nsanga Imana biruta gusara ushaje wima umugisha Eddy wo  gutunga nawe akagira umuryango”

President-” Urantutse sha ngo ndi Umusazi?”

Njyewe- ” Oya Papa ntago narota mbatuka nta musazi ubaho ahubwo ndavuga Simoni ngiye gusabira ubutitsa ngo we n’abameze nkawe Imana ishobora byose ibahindure babe bashya isi yacu ihinduke tube bamwe!”

President- Yoooooh! nibutse ko na Chanisse wanjye yambwiye ko ngo bidashoboka kubana nawe kuko yemereye undi”

Njyewe- ” Niko bimeze Papa, rero reka nsange Imana muzumva mbatumiye mu birori by’ubupadiri”

President-” Akazi se?”

Njyewe- ” nari nzanye ibaruwa isezera ahubwo reka nyibahe”

President-” Ntuziko amategeko agena ko ugomba guteguza byibura mbere y’iminsi makumyabiri?”

Njyewe- ” Ndabizi Boss, ariko nari natse na konji y’ukwezi ubwo birahuriramo nzasaba Padiri ampe uruhushya nze dukore ihererekanya bubasha nuzansimbura”

President-” Yahemuka Simoni ahekuye umuryango wanjye  ndetse na Company yanjye, ubuse iyo aguha umukobwa we ibi byose biba bibaye?”

Njyewe- ” Ahubwo akira aya mabaruwa, ubwo nzaza mumpamagaye kandi Papa warakoze cyane kunyakira mu muryango wawe nzagusabira iteka ku  meza matagatifu”

President-” Yego sha muhungu wa! ariko ntawe uzagusimbura mba ndoga Muyange wambyaye”

Njyewe- ” Reka nihute ntacyerererwa ubu Padiri arandegereje”

President-” Nta kundi dore wahisemo muhungu wanjye, ariko ugiye ntabishaka ngaho Imana washatse gukorera izakube hafi abakobwa banjye bo ubwo nkuko nabibamenyereje ndababwira inkuru yawe”

Njyewe- ” Yego Papa, Yezu kristu akuzwe”

President-” Nta kibazo rwose akuzwe cyane Muhungu wanjye”

Nahise nsezera Boss ndasohoka nsanga ba James aho bari bantegereje turakata tugera ku muhanda mpindukiza amaso ndeba aho nakoreraga moto ziba ziraje twerekeza kuri paruwase, tukigerayo nahise nkomereza kwa Padiri mukuru ndakomanga ndinjira.

Padiri-” Yooooooh! usanze nihebye ko utakije, dore nanjye ubu nari mpagurutse ngo abahaheze tugende ngirango imodoka wabonye   ko zahageze, nonese ibyangombwa byose wabibonye?”

Njyewe- ” Yego Padi,nabibonye rwose dore ngibi”

Nahise muha ibyangombwa byose asanga nta kibazo kibirimo ubundi turasohoka tugeze hanze mbona imodoka ebyiri zo mu bwoko bwa coaster.

Padiri-” Urajya muri iriya modoka y’imbere niyo irimo abifuza kuba Abapadiri naho iriya modoka y’inyuma ni iya abifuza kuba  Ababikira baturutse  muri Kenya baje  ngo bifatanye natwe mu mwiherero w’umuhamagaro wo kwiha Imana”

Nahise nshimira Padiri, negera James na Kadogo  ndabasezera bampa igikapu nurira imodoka ndicara  nongera kubapepera ubundi ninjira mu modoka yari igiye kwerecyeza i Kibeho mu mwiherero utangira inzira yo kwiha Imana.

Mu modoka namwe murabyumva nasanzemo abandi  bantu batandukanye bavuye impande n’impande  ndabasuhuza  nicara ku idirishya, ubwo hahise haza umwe mu Bapadiri twari bujyane aduhereza ibitabo by’Umukristu ako kanya  aba arambwiye ngo ntere indirimbo tugende  turirimba.

Nanjye nihagazeho  iyo naguyeho bwa mbere nahise nyitera  nubwo nayiririmbye mu buryo busekeje kubera ijwi ariko naririmbiraga Imana.

Twagiye  turirimba ndetse twahimbawe tugera  i Nyanza tugera i Huye nibuka aho nakuye Jane, turakata dufata umuhanda wa Kibeho, aho hose twanyuraga nagendaga ntekereza inzira tunyuramo ngo  tubone umutuzo wo mu mutima.

Sha burya urebye amayira yose ducamo ngo tugere kucyo twifuza batubwiye gusubira inyuma twayoba.

Twageze i Kibeho kwa Nyina wa Jambo tuvamo ubwo umu Padiri umwe ajya imbere turamukurikira tubanza mu kiliziya buri  wese avuga isengesho ako kanya haba hinjiye  umurongo w’abakobwa bifuza kuba Ababikira bari baturutse muri Kenya, bari bambaye imyenda  ibapfutse hose  n’amashapure maremare, urebye icyagaragaraga n’amaso kuri bo.

Ubwo bicaye  mu kindi gipande twari twegeranye tuba dutangiye gusenga hashize umwanya  Padiri aba agiye imbere.

Padiri-” Yezu Kristu akuzwe”

Twese- Iteka ryose”

Padiri-” rero ndashimira Ababikira bavuye muri Kenya, ndashimira kandi namwe  abaturutse mu bice byose by’U Rwanda ntibibatungure ubu mwarangije kuba bo, ubu rero dutangiye umwiherero ku mugaragaro niyo mpamvu ngirango buri wese ahaguruke asuhuze mugenzi we kuko twese tugiye kwerekeza inzira imwe igana ku Mana”

Twarahagurutse twivanga na babandi bifuza kuba Ababikira dutangira gusuhuzanya ariko kuko bagaragazaga amaso gusa buriya harimo abo twasuhuzaga kabiri.

Nageze ku mwanya w’inyuma ndimo nsuhuza abo Babikira, numva ikinya mu mubiri nsa nkaho nyobewe aho ndi  ukuntu ariko nyuma yaho numva umunezero unzamutsemo  nashigutse  numva umuntu ansunitse mpindukiye nsanga nari nafunze inzira y’abandi bari bari inyuma yanjye  ubwo mba ndakomeje nsuhuza n’abandi nsubira kwicara.

Padiri yakomeje kutubwira byinshi mubyo bagombaga kutubwira tukiri muri ibyo umusore wari wicaye impande yanjye twari twazanye aba arankomanze mpindukira vuba

We-” Niko ihangane uri kurangara bikagaragara nabi mu bandi”

Njyewe-” Eeeeeh! mumbabarire sinamenye ko nakabije”

We-“Euuuh! nonese  muri bariya bantu ko mbona batagaragaza n’amasura hari uwo wabonye uzi?”

Njyewe-“Simbizi nanjye ndigushiduka narebyeyo kandi hari amaso turi guhuza buri uko ndebyeyo”

We-” Eheeee! Ihangane rero ureke kurangara hano ni mu Kiliziya uragirango Padiri akubone urangarira abakobwa aribwo tukiza?”

Nahise  nicara ndeba imbere ariko ntakubeshye ntacyo numvaga gusa  numvishe ibya nyuma bavugaga bya gahunda  ya buri munsi, birangiye turasohoka dukurikira Padiri ajya kutwereka aho tuzajya turara sinjye wabonye bwira buracya noneho uwo munsi kwari ugutangira umwiherero nyirizina.

Uwo munsi twabyukiye mu misa irangiye tujya kunywa icyayi tugezeyo dutonda umurongo tugana ahari hari abakobwa batatu muri babandi bashaka kuba Ababikira, umwe yari afite udukombe ,undi afite icyayi,undi nawe afite imigati kubona icyayi byasabaga guca kuri wawundi w’udukombe akakaguha, warangiza ukaza kuwa kabiri agasuka icyayi, uwa gatatu akaguha umugati ugakomeza ujya kwicara.

Abandi bose bari imbere bavuyeho nanjye ngerwaho mfata agakombe ndakomeza ngera ku cyayi  ndatega nitegereje neza mbona intoki zasukaga ziri gutitira bintera kuzamura amaso ngo ndebe byibura amaso y’uwo mwana w’umukobwa ushaka kwiha  Imana asusumira.

Twabaye tugihuza amaso ndakanura buriya mu mboni z’amaso y’umuntu  Imana yarahitondeye, niho  hantu honyine ku muntu Imana yaremye ushobora kureba ukibonamo, icyo gihe nahise nibonamo kuburyo butangaje mbona isura yanjye icyeye mbega nsa nuwambaye undi mubiri,  nkiri muribyo ndebye hasi mbona icyayi cyamenetse ariko kuko hari mu ba Padiri birumvikana nta guseba kwabayeho ibintu byose biba ari amahoro.

Nahise nkomeza nicara ahantu ha njyenyine ntangira kunywa icyayi nduma no ku mugati nkanyuzamo nkareba wa mwana w’umukobwa narebye nkibona mu ifoto ya cyera ngifite umunezero ari gushyashyana mubo twari kumwe abagaburira  nagira amahirwe tugahuza amaso nkumva  umutuzo muri njye.

Dusoje twarasohotse tujya muri salle batangira kutwigisha byinshi bijyanye n’inzira twari dutangiye ari nako nandika nta na kimwe nsimbutse, saa sita zageze tutabishaka tujya gufata ifunguro rya saa sita tuvuyeyo buri wese aba yigiriye muri chambre ye kuruhuka.

Namaze kugera muri chambre umutima ntiwatuza, numvaga rwose nasohoka ubundi nkumva najya koga, mbuze icyo nkora mba mfashe  telephone mpamagara James mubwira uko byose bimeze ntiyasiba kumpumuriza no kumpa courage muri byose ibintu byanyeretse ko umuvandimwe agushyigikira mu nzira zose kuko gufata muvandimwe mu mugongo ubikora mugihe acitse intege ndetse no mu gihe afite imbaraga.

Ubwo nakuyeho telephone mfata headphones nshyira mu matwi mba numva indirimbo za Bikiraliya  hashize mwanya numva nabyo biranze Headphones  nzikuramo mfata ka gatabo Padiri yari yaduhaye  ndicara ntangira gusoma,  nagumye aho rimwe ngasoma ubundi ngataruka ngiye kumva numva mu kiliziya bari kuririmba nibukako isaha batubwiye zarenze mba nshyize bugeri  ndiruka mu kwinjira mba nkubitanye n’umukobwa umwe mu bifuzaga kuba Ababikira  wasohokaga nsa n’umuhutaje ntabishaka agwira Umubikira mukuru wari ubaherekeje yitura hasi abari mu kiliziya bose barikanga.

Ntangiye gusaba imbabazi bahise  batera ishapure twese dukora ku kimenyetso twiyegeranya dusanga abandi  dutangira gusenga, Ishapure irangiye Padiri aba agiye imbere

Padiri-” Yezu kristu akuzwe bana b’Imana”

Twese-” Iteka ryose”

Padiri-” Twatangiye umwiherero mu mitima yacu ndagirango buri wese yisuzume uko umunsi we wose wagenze”

Twafashe umwanya buri wese arisuzuma hashize akanya Padiri aba aravuze.

Padiri-“Imana ibahe umugisha ko mwisuzumye, hari usanze afite icyasha ku mutima?”

Twese turaceceka

Wa Mubikira wari uhagarariye ba bakobwa bari baravuye muri Kenya yahise ahaguruka aba aravuze,

We-” Mon Pére(Padiri) hari umuhungu wawe ugifite byinshi  bimurimo byamutera icyasha ku mutima bityo ntakore umurimo w’Imana neza, rero mwamufasha kumenya inzira yatangiye ko isaba kwitonda no kugenda ukikiye umutima”

Padiri-” Oui Ma Soeur, nibyo nari ngiye kuvuga, byambabaje kubona hari uwifuza kuba Umupadiri agwira Umubikira  uyoboye abandi mu Kiriziya?”

Ubwo  wa Mubikira yahise yongera aravuga

We-” Hari n’umukobwa wanjye nawe wasutse icyayi mu gitondo arakimena! Mon Pére(padiri) bafashe babanze bamenye inzira isaba kwitonda batangiye”

Padiri-” namwe mwese nizereko mwumviraho kandi mubonereho ko inzira turimo isaba kugenda twitonze ngo tudasitazwa n’imitego ya shitani niyo mpamvu nifuje ko uriya musoreeee”

Padiri  yatunze urutoki aho twari twicaye mbona runguyeho.

Padiri-“haguruka Mwana wanjye uze hano”

Nahise mpaguruka nsanga Padiri imbere.

Padiri-” na wawundi wifuza kuba Umubikira  wamennye icyayi mu gitondo nawe nahaguruke”

Wa mukobwa  nawe yahise yibwiriza arahaguruka aza imbere.

Padiri-“ndashaka ko saa kumi n’imwe  dusohotse  bwembi muza kwicara hariya ku ishusho ya Bikiramariya iri hariya muri jardin mukaganira ku cyatumye mwumva mwaza kwiha Imana nyuma tukaza kuganira namwe njye na ma Soeur ubundi tukabafasha  kubinjiza neza mu nzira igana Umuryango w’Imana”

Ubwo Padiri amaze kuvuga gutyo twakomeje kwiga dusoza dutinze saa kumi n’ebyiri nibwo  twasohotse ngeze hanze mpita nibuka gahunda yanjye na wa mukobwa wifuza kuba umubikira nibuka nanone ko ntamuzi isura ubwo nerekeza  ku ishusho ya Bikiramariya ngitera  intabwe ngo ngende numva ibitecyerezo byinshi muri njyewe ariko nanone numva ibyishimo  byinshi mu mutima.

Narakomeje ntera intambwe ndende nsimbuka agakingo  kari karaho ntambuka mu turabyo twaganaga  ku ishusho ya Bikiramaliya ngezeyo mbona umukobwa wambaye byabindi by’ abifuza kuba Ababikira baturutse muri Kenya yicaye ku gatebe gakoze mu giti  kareba ku ishusho ya Bikiramaliya  kuko ntawundi nari mfitanye gahunda nawe mpita nkomeza ngenda musanga uko nakomezaga kugenda mwegera ni nako numvaga umucyo mu mubiri wanjye nkimugera iruhande nicara  nitonze nanjye ndeba ku ishusho  ya Bikiramariya twese ntawe ureba undi.

Ubwo hashize nk’iminota itatu nahise nihagararaho byabindi byanjye mba ndavuze.

Njyewe-” Yezu akuzwe Ma Soeur”

Nkibivuga nategereje ko uwo mukobwa agira icyo ansubiza ariko wapi numva ntakoma ndongera nanone ndamubwira.

Njyewe-“Ma Soeur mwaba  mwumva ikinyarwanda?”

Yansubije yemera azunguza umutwe ariko areba ku ishusho ya Bikiramariya.

Njyewe-“Nizereko arimwe Padiri yavuze turi buganire  ku mpamvu   yatumye tuza hano tukisuzuma tukemera kugenda twitonze mu nzira y’Imana”

Ubwo nakomeje gutegereza ko uwo mukobwa ansubiza ngiye kumva numva atangiye kurira ubwoba mu mubiri numva burazamutse……………

Ntucikwe na Episode 90 iboneka mu masaha ari imbere…..

 

 

 

 

Abakunzi b’inkuru ya ‘EDDY’ bazahura nawe

Abantu batari bacye bagaragaje ko bakunda cyane inkuru “My day of surprise” igaruka ku buzima bw’umusore witwa Eddy, benshi bifuje guhura hagati yabo no kumenyana, by’umwihariko bakanahura n’umwanditsi wayo ‘Eddy’. Iki gikorwa kizaba tariki 14 Mutarama 2017 i Kigali.

Bamwe mu bayikunda bishyize hamwe ku rubuga rwa WhatsApp bagaragaje ubushake bwo guhura n’umwanditsi w’iyi nkuru, ariko nabo ubwabo bagahura bakamenyana.

“My day of surprise” bayikundira ko ikubiyemo inyigisho nyinshi ku bantu zirimo; urukundo, kwihangana, ubudahemuka, ubupfura, gukunda umururimo, ubucuti nyabwo, kuvugisha ukuri, kwitangira abandi, kugira ubuntu n’ubumuntu, kugira intego, kwitwara neza ku bandi n’indi myifatire ikwiriye umuntu wese.

Abakunzi b’iyi nkuru bose nta uhejwe mu guhura na ‘Eddy’, uku guhura kwateguwe na bamwe muri bo bagutangarije Umuseke ko bifuza gushimira ‘Eddy’, bakamuha impano buri wese ashaka.

Uku guhura bizaba tariki 14 Mutarama 2017 guhera saa yine za mugitondo mu busitani bwa La Palisse Hotel i Nyandungu.

Uku guhura kwabo biri gutegurwa n’itsinda ry’abakorerabushake. Uzitabira uyu muhuro asabwa gutanga amafaranga 5 000Frw kuri telephone 0788 524 104 ya Carine. Ayo mafaranga akaba ari ayo kwiyakira ku wayatanze.

Buri wese ukunda iyi nkuru ararikiwe kandi atumiwe muri uyu muhuro na Eddy.

**************