IRAN yakatiye urwo gupfa umunyamerika ishinja ubutasi

Umunyamerika ukomoka muri Iran yakatiwe igihano cyo kwicwa n’urukiko rw’I Tehran ashinjwa kuba intasi yoherejwe na  CIA gushaka amakuru muri Iran.

Amir Mirzai Hekmati, ngo agomba gupfa kubera gufatanya n’igihugu cy’umwanzi wa Iran, kuba umwe mu bagize CIA no kugerageza kwerekena ko Iran iri mu bikorwa by’iterabwoba nkuko byatangajwe.

Amir, 28, mu rubanza rwe mu kwezi gushize, byavuzwe ko yemee ibyo yaregwaga. Umuryango we uri muri Amerika wo wemeza ko umusore wabo yagiye muri Iran kwisurira ba nyirakuru.

Leta z’unze ubumwe za Amerika zo, zivuga ko uyu musore arengana kubyo aregwa, zinasaba ko akwiye kurekurwa agasubira iwabo.

Amir Hekmati, ubushinjacyaha buvuga ko yatorejwe mu birindiro bya Amerika biri muri Afghanistan na Iraq mbere yo koherezwa muri Iran.

Mu gihe yaburanaga mu Ukuboza, ubushinjacyaha bwemeje ko ibyo ashinjwa yabihamije kuri Television ya Iran, ko yemera ko yoherejwe na CIA kumenya imikorere y’ibiro by’ubutasi bya Iran.

Ibiro ntaramakuru bya Iran byavuze ko Hekmati yatangaje ubwe ko CIA yamutengushye, ariko ko akazi yari yajemo katari kagamije kugirira nabi Iran.

Umuryango w’uyu musore uba muri Leta ya Arizona, uvuga ko ibiregwa umuhungu wabo ari ibihumbano, bemeza ko yari muri Iran gusura abo mu muryango we.

Uyu musore wakatiwe kwicwa, yari umusirikare wa Amerika kuva mu 2001, akaba ngo yarafashaga gusa mu gusobanura icyarabu nkuko byatangajwe na se umubyara Ali Hekmati.

Iki gihano gikatiwe uyu musore, mu gihe hari umwuka mubi cyane hagati ya Iran na USA.

Iran ivuga ko nidahagarikirwa ibihano mu bukungu, izafunga inzira ya Hormuz inyuzwamo petrol nyinshi mu nyungu z’ibihugu byinshi birimo na Amerika.

Kuri iki cyumweru, Leon Panetta,  umunyamabanga mukuru w’igisirikare cya Amerika yavuze ko Amerika igomba kugira icyo ikora mu gihe Iran yaba ifunze iyi nzira.

Kugeza ubu ntibiratangazwa n’urukiko igihe iki igihano gikomeye kurusha ibindi Hekmati yakatiwe kizashyirirwa mu bikorwa.

Jean Paul Gashumba
UM– USEKE.COM