Frank NTILIKINA yabaye MVP wa 2016 FIBA Europe Under-18

Frank Ntilikina, umusore w’imyaka 18 niwe wabaye umukinnyi warushije abandi (MVP) mu irushanwa rya ‘2016 FIBA Europe Under-18 Championship’ ryaraye rirangiye muri Turkiya ryegukanywe n’ikipe y’igihugu y’Ubufaransa akinira.

Frank Ntilikina n’ikipe y’igihugu y’Ubufaransa batsinze ku mukino wa nyuma ikipe ya Lithuania ku manota 68 kuri 75 ya France. Muri uyu mukino gusa Ntilikina yatsinze amanota 31 atanga n’imipira itatu yavuyemo ibitego.

Ntilikina (1,96m) ukina nka ‘meneur de jeu’ yigaragaje kuva iri rushanwa ryatangira ku mikino itandatu bakinnye yose bakayitsinda afite ikigereranyo cy’amanota nibura 19 kuri buri mukino.

Yigaragaje cyane ku mukino wa 1/2 cy’irangiza wahuje France na Italie kuwa gatatu nijoro, aho yatsinze amanota 23 agatanga imipira ivamo ibitego icyenda akanakora ‘rebounds’ enye agafasha ikipe ye gutsinda ku manota 82 kuri 72 y’Ubutaliyani mu mukino wari ukomeye cyane.

Frank Ntilikina ni umusore uvuka ku babyeyi b’Abanyarwanda, yavukiye i Bruxelles mu Bubiligi atangira gukina Basketball ku myaka itanu, bimukiye i Strasbourg mu Bufaransa aho yahise ajya muri academy y’ikipe ya Basketball ya Strasbourg guhera ku myaka 15.

Mu Ukuboza 2015 Ntilikina nibwo yasinye amasezerano mu ikipe nkuru ya Strasbourg IG azamugeza mu 2019, aho akina nk’umwuga. Ikipe y’igihugu y’Ubufaransa y’ingimbi yahise imubenguka nayo.

Muri Shampiona ya Basketball 2015/2016 muri France, Ntilikina yatowe nk’umukinnyi mwiza mu bakiri bato.

Ageze muri iri rushanwa ry’amakipe y’ibihugu by’Iburayi mu batarenge  imyaka 18 ryariho ribera muri Turkiya yarushije abandi bigaragara kuri buri mukino yigaragaza nk’umukinnyi uzi gutera amanota atatu, gucenga, gutanga imipira myiza kugeza atowe nka MVP mu ijoro ryakeye ubwo ikipe ye yari imaze gutwara umudari wa zahabu.

UM– USEKE.RW