Uwicishije abantu ikamyo i Berlin uri guhigwa ni umunya-TUNISIA

Police mu Budage iri guhiga mu buryo budasanzwe umugabo ukomoka muri Tunisia ngo basanze kimwe mu byangombwa bye mu ntebe y’ikamyo yagongesheje abantu akica 12 agakomeretsa 45 bariho bahaha ibya Noheli mu isoko kuwa mbere nijoro mu mujyi wa Berlin.

Ibyangombwa babonye byanditseho uwitwa Anis Amri wavukiye mu mujyi wa Tataouine muri Tunisia mu 1992 nk’uko bivugwa n’ikinyamakuru Bild. Gusa ngo biranakekwa ko uyu mugabo yakoreshaga amazina ayari aye.

Ubuvugizi bwa Minisiteri y’ububanyi n’amahanga muri Tunisia bwatangaje ko buri kugenzura niba ayo makuru ari ukuri ko umuntu wo muri iki gihugu ari we wakoze iki gitero i Berlin.

Police mu Budage ngo yaba yari isanzwe izi uyu muntu nk’umuntu mubi kandi ufite aho ahuriye n’abahezanguni bo mu idini ya Islam.

Umugabo wari wafashwe mbere ibi bikimara kuba ni ukomoka muri Pakistan uri mu Budage nk’usaba ubuhungiro, gusa yahise arekurwa kuwa kabiri basanze bamwibeshyeho.

Uwakoze aya mabi yahise aburira mu bantu benshi muri iryo soko, hari ubwoba ko ashobora gukora andi mabi kuko anafite imbunda. mu Budage mu mujyi wa Berlin hari ikikango buri hamwe hahurira abantu benshi.

Angela Merkel uri kwiyamamariza manda ya kane yo kuyobora Ubudage aranengwa cyane n’abavuga ko politiki ye yo guha ikaze impunzi zirenga miliyoni zavuye muri Syria n’ahandi zirimo izifite ubuhezanguni muri zo.

Mu burayi hose hari umwuka w’ubwoba bw’ibitero nk’ibi kubera kwiyongera kw’ubuhezanguni bwa bamwe bitwaza idini ya Islam bashingira ku migirire ya bimwe mu bihugu by’uburengerazuba bw’isi bashinja gusenya ibihugu byabo by’abarabu.

Naho ikamyo yakoze aya mabi yo uwari uyitwaye uwayakoze yabanje kuyimwambura. Bild ivuga ko uyu mushoferi ukomoka muri Pologne yari akiri muzima ubwo uyu mugizi wa nabi yakoraga ubu bwicanyi mu isoko yaje gupfa uyu mugizi wa nabi amurashe.

Umutwe wa Islamic State wamaze kwigamba ko ari wo wakoze ibi, nk’uko wabivuze nyuma y’ubwicanyi bw’i Nice mu Bufaransa mu kwezi kwa karindwi bwari bumeze gutya bwo bwaguyemo abantu 86.

UM– USEKE.RW