Amaze gutsinda Kiyovu, J.Mulisa yanenze abatoza bizera uburozi

Iminsi icyenda (9) ya shampiyona isize APR FC na Rayon Sports zinganya amanota ziyoboye urutonde. APR FC yatsinze Kiyovu sports 1-0, umutoza wayo Jimmy Mulisa abwira abanyamakuru ko yanenze imyitwarire ya Mukura VS na Rayon sports yo kwizera uburozi.

Mu mpera z’ucyumweru zisize amakipe abiri ahora ahanganye, Rayon sports na APR FC zinganya amanota 23, byatumye zikomeza kuyobora urutonde rw’agateganyo.

APR FC yabigezeho nyuma yo gutsinda Kiyovu sports 1-0, igitego kinjiye ku munota wa 34 w’igice cya mbere cyinjijwe na Sibomana Patrick ku mupira yahawe na Issa Bigirimana.

Mu gice cya kabiri abasore Kanamugire Aloys utoza Kiyovu sports bagerageje uburyo bwinshi bwashoboraga kubyara igitego ariko ntibyashoboka umukino urangira bananiwe kubona amanota kuri APR FC muri shampiyona, ibintu Kiyovu sports iheruka tariki 30 Ukwakira 2005.

Nyuma y’uyu mukino Jimmy Mulisa utoza APR FC yavuze ko yishimiye gufata Rayon sports yo yanganyije na Mukura VS kuwa gatanu mu mukino waranzwe n’imvururu zishingiye ku burozi, ibintu uyu mutoza wa APR FC yanenze cyane.

Mulisa yagize ati: “Birababaje kubona hari abatoza bakizera bakanagendera ku burozi ibintu bidafatika. Ibyabaye ku mukino wa Rayon na Mukura narabyumvise nanarebye video zabyo. Njye n’ikipe yanjye ntitubyizera nkikina umupira sinabikoreshaga kuko ndi umukirisitu. Imana niyo imfashije kuba ngeze aha, kandi nizeye gukomeza guhanganira igikombe nkuko bisabwa umutoza wese utoza APR FC”

Nyuma y’uyu munsi wa shampiyona amakipe arambye muri shampiyona y’u Rwanda Kiyovu sports na Mukura Victory sports zikomeje kumanuka ku rutonde rw’agateganyo rwa AZAM Rwanda Premier Ligue kuko Kiyovu iri ku mwanya wa 10 n’amanota 11, naho Mukura VS ikaba ku mwanya wa 12 n’amanota icyenda (9) angana n’imikino yakinnye.

Imikino yose yabaye mu mpera z’iki cyumweru:

Kuwa gatanu
Mukura VS 1-1 Rayon Sports

Kuwa gatandatu
AS Kigali 4-2 Kirehe FC
Espoir Fc 3-0 Pepiniere FC
Police Fc 2-0 Etincelles
Gicumbi Fc 1-2 Bugesera FC

Ku cyumweru
SC Kiyovu 0-1 APR FC
Musanze Fc 1-0 Marines FC
Sunrise Fc 0-0 Amagaju FC

Roben NGABO
UM– USEKE.RW