Nyaruguru: Aba bagore batangiye bizigama igiceri cy’100, ubu 2016 bungutse miliyoni 30

Koperative ihinga ikwa yitwa Nyampinga igizwe n’abagore 117 n’abagabo batatu gusa, ikorera mu murenge wa Rusenge muri Nyaruguru, mu 2007 abayigize nibwo  bishyize hamwe ngo barwanye ubukene bari bafite, batangira bizigamira igiceri cy’ijana buri cyumweru uko bahuye. Nyuma y’imyaka icyenda babigezeho, nta bukene bafite ahubwo bageze ku ruganda rwabo rwungutse muri uyu mwaka agera kuri miliyoni 30.

Iyi koperative ikora imirimo y’ubuhinzi, gutunganya no gucuruza ikawa, umusaruro wabo watangiye kubona isoko no muri USA

Bavuga ko bagitangira mu 2007 bari bugarijwe n’ibibazo bishingiye ku bukene mu miryango yabo. Bakumva inama z’ubuyobozi bukangurira abantu kujya hamwe mu mashyirahamwe bagasha uko bakemura ibibazo bafite.

Umuseke wabasuye aho bakorera i Rusenge mu kagari ka Bunge. Abayigize bavuga ko ubu bivanye mu bukene, buri munyamuryango yoroye itungo rigufi kandi afite imigabane mu ruganda ubu bagezeho.

Bagitangira ngo uko bahuraga buri cyumweru bizagamiraga igiceri cy’ijana kugira ngo hamwe bibafashe gufanya mu bibazo bimwe na bimwe. Bahereye kuri iki gice bagiye buhuza imbaraga mu buhinzi bwa kawa kugeza ubwo ubu bafite uruganda.

Mu banyamuryango 120 bagize Koperative NYAMPINGA abagabo ni batatu gusa, kubera imyumvire ikiri hasi y’abagabo benshi nk’uko bivugwa na Sibomana Venuste umwe muri aba batatu bayirimo. Nyamara ngo imiryango irafunguye no ku bandi bagabo bakwifuza kwisungana n’aba bagore.

Esteri Mukangango niwe Perezidante wa NYAMPINGA, avuga ko kwizigama bahereye hasi, kugira intego no guharanira kuzigeraho aribyo byatumye ubu bafite koperative ikomeye iwabo aha Rusenge na Nyaruguru.

Ku bufatanye n’abafatanyibikorwa nka Sustainable Harvest Rwanda ubu ikawa yabo yabonye isoko muri Amerika , mu 2015 nibwo ngo yatangiye kujyayo ifite izina rya NYAMPINGA uyu mwaka ngo bungutse miliyoni 10.

Mukangango ati “mu 2015 ikawa yacu ibona isoko muri Amerika twungutse miliyoni icumi kuko twari twagize udukawa duke. Uyu mwaka twabonye Toni 129,7 kandi twaranishyuye (inguzanyo) ubu dufite miliyoni 30 twungutse .”

Abagore bo muri iyi Koperative bandi baganiriye n’Umuseke bavuga ko ubuzima bwabo bwahindutse, ngo nta ukibura ubwisungane mu kwivuza , nta ucyambara nabi kandi bose ubu borojwe itungo rigufi.

Intego yabo umwaka utaha ni uguhinga bagasarura Toni 500 za kawa,bakunguka bagakomeza gutera imbere no guteza imbere imiryango yabo n’igihugu cyabo.

Callixte NDUWAYO
UM– USEKE.RW