Jimmy Mulisa ngo agiye guha amahirwe abakinnyi batakoreshwaga

APR FC niyo kipe yandikishije abakinnyi benshi (30), kurusha izindi muri shampiyona y’u Rwanda. Umutoza mushya wayo Jimmy Mulisa yemeza ko agiye guha amahirwe abakinnyi bose bikazatuma n’abatakoreshwaga bigaragaza.

Nyuma yo gutsinda Etincelles 2-1 umukino w’umunsi wa karindwi wa shampiyona y’u Rwanda AZAM Rwanda Premier League, Jimmy Mulisa watozaga umukino wa mbere nk’umutoza mukuru wa APR FC, yemeje ko agiye gutanga amahirwe ku bakinnyi bose b’iyi kipe.

Buri mpera z’umwaka w’imikino, APR FC igura abakinnyi bashya kandi beza muri shampiyona y’u Rwanda, kuko ari ikipe ihora ishaka gutwara ibikombe no kugera kure mu marushanwa ya Africa.

Abatoza bayo bagiye bagorwa no gukoresha abakinnyi bayo bose kuko baba ari 30, kandi bagomba gutoranywamo 18 bajya mu mukino, na 11 bajya mu kibuga. Ibintu Jimmy Mulisa avuga ko afitiye igisubizo kirambye.

“Ni byiza cyane kugira ikipe ifite abakinnyi benshi beza, kuko uhitamo uwo ushaka bitewe n’umukino. Ariko nanone bigora umutoza kuko bisaba gufata umwanzuro wo gusiga bamwe hanze kandi bitwaraga neza mu myitozo.

Nifuza gukora itandukaniro nkatanga amahirwe ku bana benshi hano. Kuko mbere APR FC iba yarabazanye kuko bari ku rwego rwiza. Byaba bibabaje kuba aritwe twagira uruhare mu gusubiza inyuma urwego rwabo. Nzatanga amahirwe ku bakinnyi bose kuko tuzanitabira amarushanwa atandukanye kandi bizatanga umusaruro ndabyizeye.” – Jimmy Mulisa

Umunsi wa mbere yatoje APR FC, wagaragayemo abasore badakunze gukoreshwa nka Djamar Mwiseneza na Nshuti Innocent baje mu kibuga basimbuye.

Photos © Innocent Ishimwe/Umuseke

Roben NGABO
UM– USEKE.RW