Amiss Cedric aratangira imyitozo muri Rayon

Amiss Cedric ari mu Rwanda kuva mu cyumweru gishize aho yaje kureba umuryango we, ni nyuma yo kurangiza amasezerano y’imyaka ibiri yari afitanye n’ikipe ya Chibuta yo muri Mozambique akaba atarongerwa. Hagati aho amakuru agera k’Umuseke aremeza ko kuri uyu wa mbere atangira imyitozo muri Rayon Sprots.

Cedric abafana ba Rayon Sports ntibazamwibagirwa kuko yahesheje Rayon igikombe cya shampionat 2013 atsinda ibitego 14 mu mikino 13 yakinnye.

Hari amakuru yemeza ko Rayon Sports yifuza kugumana uyu mukinnyi ubu udafite ikipe, ariko ikaba ubu izitiwe n’uko abayobozi bayo bari iburayi aho bagiye mu gikorwa cyo gusabana n’abafana ba Rayon Sports baho.

Biteganyijwe ko bazagirana ibiganiro n’uyu mukinnyi nibagaruka, nubwo hari n’andi makipe amwifuza.

Amiss Cedric ni rutahizamu w’umurundi ariko ufite umugore uba Rwanda ari naho ari muri iyi minsi.

Kuri uyu wa mbere aratangira imyitozo hamwe n’abakinnyi ba Rayon Sports, ikinamo abandi barundi bagenzi be Pierrot Kwizera na Shasir Nahimana.

Muri Shampionat yo mu Rwanda amategeko yemerera ikipe gukinisha abakinnyi batatu b’abanyamahanga muri 11 babanza mu kibuga. Rayon Sports isanganye abakinnyi bane b’abanyamahanga (Mussa Camara, Shassir Nahimana, Mugheni Fabrice na Pierrot Kwizera)

UM– USEKE.RW