Rajab Bizumuremyi na Mbusa Kombi Billy bagiye gutoza FC Scandinavie

Abatoza Mbusa Kombi Billy na Radjab Bizumuremyi bagiye gutoza ikipe yiyandikishije mu kiciro cya kabiri, FC Scandinavie y’i Rubavu.

Bitunguranye ikipe nshya yo mu karere ka Rubavu, FC Scandinavie iyobowe n’umunye-Congo Kasongo Paruku Thierry yamaze kwiyandikisha mu kiciro cya kabiri.

Iyi kipe ifite intego yo kongera kuzamura impano nyinshi zo muri Rubavu, yamaze gusinyisha abatoza babiri bazwi muri ruhago y’u Rwanda.

Umutoza mukuru wa FC Scandinavie ni Mbusa Kombi Billy wari umutoza wungirije muri Rayon Sports kuva 2011 kugera 2013.

Uyu mugabo nawe ukomoka muri DR Congo yahesheje Rayon igikombe cya shampiyona iheruka yungirije Didier Gomes Da Rosa.

Billy yabonye akazi ko gutoza FC Scandinavie abisabiwe na Radjab Bizumuremyi wamaze gusinyishwa n’iyi kipe yo mu kiciro cya kabiri nka directeur technique.

Bizumuremyi watoje amakipe menshi yo mu kiciro cya mbere mu Rwanda nka Marine FC na Etincelles FC z’i Rubavu, yabwiye Umuseke ko yishimiye kongera kugaruka mu mupira w’amaguru.

“Nari maze imyaka ibiri ntari mu bikorwa by’umupira w’amaguru, nishimiye kugaruka mu muryango. Icyo navuga ni uko nemeye aka kazi kuko nshaka kugarura umupira mu rubyiruko rw’i Rubavu, umutoza Billy tuzakorana neza kandi nkeka ko umusaruro uzagaragara bidatinze.” – Radjab Bizumuremyi

Iyi kipe yatangiye imikino ya gicuti, ni mu irushanwa riri kubera kuri stade Umuganda.

FC Scandinavie yatsinzwe n’ikipe (selection) y’abakinnyi bavuka i Rubavu 1-0. Naho Marine FC itsinda Vision Jeunesse Nouvelle 2-0.

Kuri iki cyumweru iri rushanwa rirakomeza, Vision Jeunesse Nouvelle ikina na Scandinavie FC, naho Marine FC ikine na Selection ya Rubavu.

Roben NGABO
UM– USEKE.RW