Jarama: Baratabaza nyuma yo gukurwa muri VUP ku maherere

Iburasirazuba – Mu murenge wa Jarama akarere ka Ngoma hari abageze muzabukuru bavuga ko bakuwe mu bahabwa inkunga ya VUP mu buryo budakwiriye ariko by’umwihariko ngo bababajwe cyane n’uko bimwe amafaranga yabo bizigamye mu gihe bari bakiri muri VUP.

Ubuyobozi bw’uyu murenge wa Jarama buravuga ko bakuwemo kuko batari bujuje ibisabwa ngo bafashwe muri VUP naho kubijyanye n’ubwizigame bwabo ngo amafaranga yabo yashowe mu mushinga w’ingurube kandi ngo nubwo bavuye muri VUP nta mpungenge bakwiye kugira kuko baracyafite uburenganzira ku mushinga wakozwemo amafaranga yabo bizigamaga.

Ni abasaza n’abakecuru bavuga ko barenga mirongo itatu abenshi muri bo bari mu kiciro cya mbere cy’ubudehe, hari nabavuga ko ntako babayeho badafite n’umuntu n’umwe babana ubafasha, ngo ntibakabaye bavanwa muri VUP.

Minani Yohana w’imyaka 83 y’amavuko aragira ati “Nari nsanzwe mfashwa kandi ngo mu kiciro cya mbere cy’abatishoboye, nta bushobozi mfite none gitifu w’Umurenge yanyambuye imfashanyo (VUP) nari nahawe na Kagame”.

Undi witwa Genevieve Cyizere w’imyaka 72 avuga ko we aba wenyine mu nzu ngo ndetse n’abaturage barabizi baranamwemeje ageze ku kagari nabo barabyemeza ariko k’Umurenge bamukuramo.

Aba bahoze bafashwa muri VUP bavuga ko batanahwe amafaranga y’ubwizigame bwabo, batazi neza umubare.

Rosatta Kakuze w’imyaka 76 y’amavuko ati “Bankuyemo (muri VUP) kandi ntishoboye nararenganye nabuze n’undenganura ariko ntibanampaye udufaranga twanjye bankataga”.

Aba baturage basaba Perezida wa Repubulika Paul Kagame kubarenganura.

Nubwo banashyizwe mu mushiga wokorora ingurube bavuga ko batari babyemeranyijwe ngo bakabaye barahawe amafaranga yabo yose.

Maurice Jafet umuyobozi w’Umurenge wa Jarama yatubwiye ko aba baturage bavuyemo kuko batari bujuje ibisabwa ngo bahabwe inkunga ya VUP.

Aragira ati “Abahabwa inkunga ya VUP ni abari mu kiciro cyambere cy’ubudehe kandi muri urwo rugo hakaba nta muntu n’umwe ukora”.

Gitifu Jafet avuga ko aba baturage bagifite uburenganzira kumushinga wakozwe mu mafaranga yabo nubwo batakiri mu bagenerwa inkunga ya VUP.

Elia BYUK– USENGE
UM– USEKE.RW