YAVUGURUWE: Inkongi y’umuriro yibasiye Bambino Super City i Kabuga

Gasabo, Kabuga – Inkongi y’umuriro bitaramenyekana icyayiteye yibasiye Bambino Super City mu masaha ya saa yine z’igitondo kuri uyu wa gatatu.  Umunyamakuru w’Umuseke uriyo aravuga ko ubu hari gukorwa ibikorwa byo kuzimya uyu muriro.

Uyu muriro ngo watangiye ahagana saa tanu uza ari mwinshi cyane, bitacyekwa ko ngo waba wavuye mu bikoni.

Abakozi kuri iki cyanya cy’imyidagaduro kizwe cyane i Kigali babwiye umunyamakuru w’Umuseke ko uyu muriro waje ari mwinshi ugakwirakwira vuba ubutabazi bwa Police bukahagera bidatinze ariko bugasanga hari ibyangiritse.

Igice cyahiye ni icyo ahagana hirya hafi y’imyicundo y’abana.

Augustin Gatarayiha umuyobozi wa Bambino Super city yabwiye Umuseke ko bataramenya icyateye iyi nkongi ariko bakeka ko yaba ari amashanyarazi.

Ibyari muri Restaurant byose byahiye, avuga ko umuriro watangiye ahagana saa yine n’iminota 10 ariko ibyangiritse bitabuza ko bakomeza gutanga service kuko ari igice kimwe cyahiye.

Gatarayiha avuga ko basanzwe bafite ubwishingizi.

Bambino Super City hazwi cyane mu kwakira imyidagaduro y’abana n’abakuru.

Evode MUGUNGA
UM– USEKE.RW